न्हूपुखू सिबें भाजु पुखू पुलां

ख्वप – ख्वप नगरपालिका वडा नं. १ य् च्वंगु ऐतिहासिक भाजु पुखू येँया लानि पूखू नं धाइगु न्हूपुखू स्वयां न्यासःदँ पुलां जूगु तथ्य विज्ञतय्सं पत्ता लगे याःगु दु ।

लछिया लागिं धकाः अध्ययन याकेत ख्वप नपां प्रा.डा. पुरुषोत्तमलोचन श्रेष्ठया नेतृत्वय् खुला न्ह्यः दयेकूगु विज्ञ पुचलं उगु पुखूया अध्ययन यायेधुंकाः म्हिगः सार्वजनिक याःगु प्रतिवेदनय् स्वसःदँ पुलां जुइमाः धकाः अनुमान यानातःगु उगु पुखू वास्तवय् च्यासःदँ पुलां जूगु प्रमाणत प्रशस्त हे लुयावःगु खँ विज्ञतय्सं धाःगु दु ।

ख्वप नगरपालिकाया सभाकक्षय् थःपिंसं तयार याःगु कार्यदलया ८१ पृष्ठ तःपंगु प्रतिवेदन बारे सार न्यंकादिसें प्रा.डा. पुरुषोत्तमलोचन श्रेष्ठं थ्व पुखू ख्वप नगरयात राजधानी नगर कथं विकास यायेगु सुरु जूगु इलय् हे तयार यानातःगु जलेश्वरया देगः पुखूया दथुइ तयाः दयेकातःगु सेनां घेरा यानाः बल्लाक निर्माण यानातःगु दरवार लागाया छगू नमूना खः धयादिल ।

ज्याझ्वःया मूपाहां नेमकिपाया सचिव व सांसद प्रेम सुवालं भाषा, संस्कृति व ललितकलाया विकास यायेगु स्थानीय निकायया ज्याय् ख्वप नगरपालिकां ऐतिहासिक भाजु पुखू पुनःनिर्माण यानाः नमूना क्यनेत्यंगु खँ कनादिल ।

ख्वप नपाया मेयर सुनिल प्रजापतिं सभापतिया थासं न्ववासें २०५९ सालं ख्वप नगरपालिकां सुरु याःगु उगु पुखूया जीर्णोद्धारया ज्या हाकनं थगुने जेठं थःपिं नगरपालिकाय् त्याना वयेधुंकाः छगू प्रतिष्ठाया विषय दयेकाः ज्या न्ह्याकेत्यनागु खँ कनादिल । खुला बिकाः तयार याःगु प्रतिवेदन तसकं उपयुक्त ढंगं वःगु खँ ख्वपया प्रमुख जिल्ला अधिकारी नारायणप्रसाद भट्टं कनादिल ।

अन्तक्र्रिया ज्याझ्वलय् पुरातत्व विभागया महानिर्देशक भेषराज दाहाल, गुथि संस्थानया पुलांम्ह महानिर्देशक लक्ष्मणराज ज्ञवाली, गुथि संस्थानया निर्देशक मीनराज चौधरी, संस्कृतिविद् तेजेश्वरबाबु ग्वंगः, स्मारक संरक्षण तथा दरवार हेरचाह अड्डाया प्रमुख कल्पना प्रजापति, प्रेमसिं बस्नेत लगायतं थःथःगु धारणा न्ह्यब्वयादिल ।

 

 

सम्बन्धित बुखँ

LEAVE YOUR COMMENTS