ने. सं. ११४६ अनलाथ्व पुन्हि -

आचार्यया आत्मदाहं देय्न्यंकं न्ह्यसःया न्ह्यसः

येँ (नेपालभाषा टाइम्स)- म्हीग न्हिनय् न्हू वानेश्वरय् संसद भवनया न्ह्यःने हे आत्मदाह याःम्ह प्रेम आचार्यं म्हिगः प्राण त्याग यायेवं सामाजिक सञ्जालय् सरकारया कडा आलोचना शुरु जूगु दु । आचार्यं आत्मदाह याये न्ह्यः थम्हं अथे याये माःगुया कारण स्पष्ट यासें ताःहाकःगु स्टाटस च्वया थकूगु खः । उकी आचार्यं थम्हं आय आर्जन जुइगु थीथी ज्या यायेत स्वयागु खःसां देय्या आर्थिक नीति व थीथी निकायतय्सं दुःख बिउगुलिं ज्या हे याये मफयाः आत्मदाह यायेमाःगु खँ न्ह्यथनातःगु दु ।

थ्वहे झ्वलय् आचार्यं आत्मदाह याये न्ह्यः थंगु थ्व न्ह्यसःयात कयाः सरकारं छानविन याइगु जूगु दु । थुकिया बारे छानबिन यायेत मन्त्रिपरिषदं गृह मन्त्रालययात जिम्मेवारी बिउगु दु । म्हिगः च्वंगु मन्त्रिपरिषद बैठकं आत्मदाह याःम्ह आचार्यया विषयय् छानविन यायेत व फयांफछि याकनं प्रतिवेदन तयार यायेत नंं गृह मन्त्रालययात जिम्मेवारी बिउगु खः ।

मन्त्रिपरिषदं आचार्यं सामाजिक सञ्जाल फेसबुकय् ल्ह्वंगु विषय व आत्मदाहया कुतः बारे सीकेत गृह मन्त्रालययात जिम्मेवारी बिउगु खः । उकथं हे आचार्यया छेँजःपिंत राहत बीगु बारे माःगु निर्णय यायेगु जिम्मा नं गृह मन्त्रालययात बिउगु दु ।

थ्वहे झ्वलय् आत्मदाह याःम्ह आचार्यं ल्ह्वंगु विषययात कयाः राज्यं सम्बोधन यायेमाःगु व आचार्ययात न्याय बीमाःगु माग यासें येँया फिब्व ख्यलय् ‘काठमाडौं अपराइजिङ’ नामं प्रदर्शन याःगु दु ।
नागरिक समाजया न्ह्यलुवा व ल्याय्म्हतय्सं आचार्यया न्याय नापं मेपिं पीडित ल्याय्म्हतय्गु न्यायया निंतिं सरकारयाके माग याःगु खः । प्रदर्शनकारीतय्सं आचार्य मदुगुली दुःख प्वंकुसें २५ बुँदे माग नं न्ह्यब्वःगु दु ।

प्रदर्शनकारीतय्सं ‘ज्या यानाः नये बिउ, प्रेमप्रसाद आचार्यया आत्महत्या मखु हत्या खः, आत्मदाह याइगु मेगु म्ह जिगु मजुइमा, थ्व देश खः कि वधशाला ?’ धइगु प्लेकार्ड नं ब्वया वःगु खः ।
म्हिगः हे उपप्रधान लिसें गृहमन्त्री रवि लामिछानें आचार्यया छेँजःयात नाप लाःगु दुसा आचार्यया कलाः नानु आचार्यं थः मस्तय् भविष्य सुनिश्चित यायेत, थःत रोजगारी बीत व आचार्यं कयातःगु त्यासा पुला बीत इनाप याःगु खः ।

मंगलवाः न्हिनय् आचार्यं संसद भवन पिने प्रधानमन्त्री पुष्पकमल दाहाल पिहां वनेवं वय्कःया सवारी न्ह्यःने हे थःगु म्हय् पेट्रोल लुनाः आत्मदाह याःगु खः । ८० प्रतिशत म्ह च्याःम्ह आचार्यं म्हिगः बुधवाः मदुगु खः ।