शेरबहादुरयात मंगलवाः ५ बजे दुने प्रधानमन्त्री दयेकेत परमादेश

येँ – सर्वोच्च अदालतं प्रधानमन्त्री केपी ओलीं विटघन याःगु संसद पुनस्र्थापनाया फैसला यासें कांग्रेस सभापति शेरबहादुर देउवायात मंगलवाः सनिलय् ५ बजे दुने प्रधानमन्त्री नियुक्त यायेत परमादेश बिउगु दु ।

सर्वोच्च अदालतं संविधानया धारा ७५ (४) या प्रक्रियाय् मवँसें प्रधानमन्त्री ओलीं धारा ७५ (७) कथं प्रधानमन्त्रीइ याःगु दावी संविधान सम्मत मजू धासें देउवायात प्रधानमन्त्री दयेकेत परमादेश बिउगु खः ।

संविधानया धारा ७६ (३) कथं वैशाख ३० गते हाकनं प्रधानमन्त्रीइ नियुक्त जुयादीम्ह ओलीं ३० न्हु दुने विश्वासया मत कायेमाःगु खःसां विश्वासया मत कायेत संसद वने मखु धासें संविधानया धारा ७६ (५) कथं प्रधानमन्त्री नियुक्त यायेत राष्ट्«पतियात सिफारिस याःगु खः । थ्व हे सिफारिस कथं राष्ट्रपति विद्यादेवी भण्डारीं प्रधानमन्त्रीया निंतिं आह्वान याःगु खः । गुकी कांग्रेस सभापति शेरबहादुर देउवा कांग्रेसया ६१, माओवादी केन्द्रया ४९, एमाले माधवकुमार नेपाल समूहया २६, जनता समाजवादी पार्टीया उपेन्द्र यादव पक्षया १२, राष्ट्रिय जनमोर्चाया १ म्ह यानाः १४९ म्ह सांसदतय् हस्ताक्षर सहित प्रधानमन्त्रीइ दावी याःगु खः । अथेहे ओलीं नं एमाले व जसपाया फुक्कं सांसदतय् समर्थन थःके दुगु धासें प्रधानमन्त्रीइ दावी याःगु खः । तर राष्ट्रपति भण्डारीं निम्हेसियागुं दावी मगाः धासें मन्त्रिपरिषद्या सिफारिसं प्रतिनिधिसभा हे विघटन यानाबिउगु खः ।

थ्व लिपा कांग्रेस, माओवादी केन्द्र, एमालेया नेपाल समूह, जसपाया यादव पुचलं सर्वोच्चय् मुद्दा तःगु खः । थ्व मुद्दाय् सोमवाः फैसला यासें सर्वोच्चं देउवायात मंगलवाः सनिलय् ५ बजे दुने प्रधानमन्त्री दयेकेत व साउन ३ गते ५ बजे दुने संसदया बैठक सःतेत आदेश बिउगु खः ।

सर्वोच्चया आदेश लिपा ओली समर्थक कार्यकर्तात धाःसा सतक वयाः विरोध प्रदर्शन यानाच्वंगु दु ।