ने. सं. ११४४ कौलाथ्व चौथी -

११ किसिमया वासः ममीत निर्देशन

येँ – थौंकन्हय् बजारय् आपालं कथंया नकली व कम गुणस्तरया वासः वयाच्वंगुलिं औषधी व्यवस्था विभागं बजारय् वनेधुंकूगु वासः मीगु बन्द यायेगु व उकी मध्ये नं गुलिखे वासः ला तुरुन्त लित हे का धकाः सार्वजनिक रुपं आह्वान याःगु दु ।

भारतं वयाच्वंगु व गुलिखे नेपालय् हे उत्पादन जुइगु वासःत नकली लाःगु व गुलिं कम गुणस्तरयुक्त जूगु धकाः छुं ई न्ह्यः तिनि चर्चाय् वःगु खः । वहे झ्वलय् औषधी व्यवस्था विभागं बजारय् वयाच्वंगु छुं छुं वासः यंकाः परीक्षण याःबलय् गुणस्तर मगाःगु खने दयेवं तुरुन्त हे उकिया बिक्री रोके या धकाः आर्वजनिक आह्वान याःगु खः ।

विभागं आः तत्कालया लागिं १० किसिमया वासःया बिक्री रोके यायेगु व छता वासः चाहिँ गन गन मियातःगु दु अनं वनाः लित हे कया हजि धकाः निर्देशन बिउगु दु । बजारं तुरुन्त हे लित कया हजि धाःगु वासः नेपाःया बारास्थित आर्या फर्माल्याबय् उत्पादन जूगु ‘मिपुर ओइन्टमेन्ट’ नांयागु वासः खः । थ्व वासः सुनां नं न्याये मी मयायेत, प्रयोग मयायेत व सिफारिस नं मयायेत नं विभागं सकसितं इनाप याःगु दु ।

अथे हे क्यूरेक्स फर्मासिटिकलं उत्पादन याःगु ‘पोभिन’ नांगु वासः न्हय्गू ब्याच तक मीगु बन्द यायेत नं इनाप याःगु दु ।
थुपिं वासःत परीक्षण याःबलय् उकिया गुणस्तर कम खने दुगु खँ विभागं धाःगु दु । वासः पसल्यातय्त थ्व वासः ममीत व डाक्टरतय्त सिफारिस मयायेत नं इनाप याःगु दु ।

बजारय् वयाच्वंगु नकली व कम गुणस्तरया धकाः पत्ता लगे जूगु जक आः रोके याःगु खः । पत्ता लगे मजूनिगु व रोके याये मफयाच्वंगु मेगु नं तःता कथंया वासः बजारय् दयेमाःगु खँ व्यवसायीतय्सं धाःगु दु ।