गृहणीया प्रारम्भिक साधारण सभा

येँ – थनि झिंप्यदँ न्ह्यः ओमबहाः त्वाःया ११ म्ह गृहणी मुनाः चिनि महर्जनया अध्यक्षताय् लछिया सछि सछि तका बचत यानाः शुरु याःगु गृहणी बचत कोष थुगु दँय् विधिवतरुपं दर्ता दु । प्रारम्भिक कालय् कोषया नामं संचालन जुयाच्वंगु खःसा आः वयाः गृहणी बहुउद्देश्यीय सहकारी संस्था लि.या नामं दर्ता जूगु दु । वंगु शनिवाः थनया ताम्सिपाखास्थित न्यू जेनिथ मोडेल स्कुलय् न्हापांगु प्राराम्भिक साधारण सभा जुल ।

झिंप्यदँया दौरानय् गृहणीतय्त सक्षम यायेगु आज्जु ज्वनाः लाकां दयेकेगु, अचार दयेकेगु व कम्पोष्ट मल दयेकेगु थेंज्याःगु आयआर्जन जुइगु तालिम बियाच्वंगु संस्थाय् दुजःपिं थ्यने धुंकूगु दुसा बाल बचतय् नं थ्यंमथ्यं सछिम्हं मल्याक दुजः दयेकाः छगू करोड मल्याकं पूँजि संचालन याना वयाच्वंगु दु ।

ज्यासना पुचलय् अध्यक्षय् बिमा महर्जन, उपाध्यक्ष रिना महर्जन, सचिव सरिता श्रेष्ठ, कोाषाध्यक्षय् रविना महर्जन च्वनादीगु दु । अथे हे दुजलय् लक्ष्मी महर्जन, रामदेवी महर्जन व हेराशोभा महर्जन च्वनादीगु दु ।
उगु ज्याझ्वलय् सुनी महर्जया संयोजकत्वय् गठन याःगु लेखा समितिइ रिता श्रेष्ठ व अनिता महर्जन दुजःकथं ल्यःगु दु ।

येँ महानगरपालिका २३ वडाअध्यक्ष मचाराजा महर्जन मूपाहांकथं झायादीगु उगु ज्याझ्व चीनि महर्जनया सभाध्यक्षताय् जूगु खः । ज्याझ्वलय् विशेपाहां कथं लुमन्ति आवासका लागि सहयोग संस्थाया महेन्द्र शाक्य, सामुदायिक महिला मञ्च लक्ष्मीतारा डंगोल, ज्यापु पुचः ओमबहाःया अध्यक्ष राजभाई ज्यापु, येँ महानगरपालिका २३ वडा सदस्य चन्द्रादेवी मानन्धर, न्यूजेनिथ मोडेल स्कुलया प्रिन्सिपल नापं संस्थाया सल्लाहकार राजु महर्जन व सहकारी विभागया शिवजी भट्टराईपिं झायादीगु खः ।

संस्थां सहकारी विकास तालिम लिसें आय आर्जन जुइगु थीथी तालिम नं बीगु जानकारी बिउगु दु ।

सम्बन्धित बुखँ

LEAVE YOUR COMMENTS