ने. सं. ११४४ कछलागा पञ्चमी -

टि–२० विश्वकप छनोट – सुपर ओभरय् नेपाः बुत, ओमानयात उपाधी

येँ (नेपालभाषा टाइम्स)- टि–२० विश्वकप अन्तर्गतया एशिया छनोटया निंतिं जुयाच्वंगु धेंधेंबल्लाःया फाइनलय् नेपाः पराजित जूगु दु । आइतवाः जूगु फाइनल कासा नेपाः सुपर ओभरय् ओमानपाखें पराजित जूगु खः । पराजित जूसां नेपाः थ्वयां न्ह्यव हे विश्वकपया निंतिं धाःसा छनोट जुइधुंकूगु दु ।

आइतवाः जूगु फाइनलय् निगुलिं टिमं १८४ रन दयेकेवं कासा रोमाञ्चक मोडय् वःगु खः । निगुलिं टिमया रन बराबर जुइवं कासा सुपर ओभरय् वंगु खः । सुपर ओभरय् ओमानं न्हापां ब्याटिङ यासें २१ रन दयेकूगु खः । लिसलय् ब्याटिङ याःवःगु नेपालं १० रन जक दयेकेफुगु खः ।

थ्वयां न्ह्यः कासाय् न्हापां ब्याटिङ यासें नेपालं १८५ रनया लक्ष्य बिउगु खः । लिसलय् मैदानय् कुहांवःगु ओमानं विस्फोटक ब्याटिङ यासें कासा त्याकीगु लक्षण क्यंगु खः । अन्तिम ओभरय् आमानयात कासा त्याकेत च्यागू रन जक दयेकूसा गाःगु खः, तर नेपाःया बलर सन्दीप लामिछाने अन्तिम ओभरय् निगू विकेट कयाबीवं ओमानं १८४ रन जक दयेकेत ताःलाःगु खः ।

न्हापां ब्याटिङ याःगु नेपालं खुगू विकेटया क्षतिइ १८४ रन दयेकूगु खः । नेपाःया सुरुवात धाःसा बांमलाःगु खः । स्वंगूगु ओभरय् हे ओपन आशिफ शेख ६ रन जक दयेकाः आउट जूगु खः । थ्व लिपा कुशल भुर्तेलं आक्रमक ब्याटिङ यात । वं निगू छक्का व स्वांगू चौका थ्वासें २२ बलय् ३१ रन दयेकूगु अवस्थाय् ७.१ ओभरय् क्याच आउट जुल ।

झिगू ओभरया दुने नेपाःया प्यंगू विकेट वनेधुंकूगु खः । थ्व इलय् तक सन्दीप जोरा १० रन दयेकाः व कुशल मल्ल ३ रनय् आउट जूगु खः । थ्व लिपा गुलशन झां आक्रमक पारि म्हितेवं नेपाःया हाकनं लयय् खनेदुगु खः । गुलशनं न्यागू चौका व प्यंगू छक्का सहित ५४ रन दयेकूगु खः । टि –२० कासाय् गुलशनया थ्व न्हापांगु अर्धशतक खः । थ्व झ्वलय् वं कप्तान रोहित पौडेललिसे जानाः ७८ रनया साझेदारी याःगु खः । न्यागूगु विकेट कथं गुलशन आउट जूबलय् तक नेपाःया रन १३८ थ्यनेधुंकूगु खः ।

कप्तान पौडेलं नं आक्रामक ब्याटिङ यासें ५२ रनया अविजित पारि म्हितूगु खः । गुलशन धुंकाः वःम्ह विवेक यादवं १ रन जक दयेकेत ताःलात सा थ्व लिपा वःम्ह करण केसी २० रनया योगदान बिउगु खः । करणं ६ बलय् हे २० रन दयेकूगु खः ।

नेपाःया निंतिं नेपाःया निंतिं सन्दिप लामिछाने व करण केसीं निगू निगू विकेट काःगु खःसा सोमपाल कामी, अविनाश बोहरा, गुल्शन झा व विवेक यादवं छगू छगू विकेट काःगु खः ।्
कासामितय्त धेंधेबल्लाःया उपाधि प्रधानमन्त्री पुष्पकमल दहालं बियादीगु खः । नेपाः व ओमान निगुलि सन् २०२४ य् वेस्ट इन्डिज व अमेरिकाय् जुइगु टि–२० विश्वकपया निंतिं छनोट जुइ धुंकूगु दु । आइसिसी टि–२० विश्वकप सन् २०२४या जुन ४ निसे ३० तक जुइ । विश्वकपय् उपाधिया निंतिं २० गू देशं धेंधेंबल्ला याइ ।