पुलांपिं कुमारियात आवासया निंतिं कुतः जुयाच्वंगु दु – उपप्रमुख
येँ(नेपालभाषा टाइम्स)- येँ महानगरपालिकां पुलांपिं श्रीकुमारि, श्रीगणेश व श्रीभैरवयात चालु आर्थिक दँया स्वलाया श्रीपद भत्ता लःल्हाःगु दु । येँ महानगर उपप्रमुख सुनिता डंगोलं वंगु विहीवाः श्रीकुमारि, श्रीगणेश व श्रीभैरवयात चालु आर्थिक दँया साउन, भदौ व असोजया श्रीपद भत्ता लःल्हानादीगु खः ।
श्रीपद भत्ता कयादीपिं पुलांपिं कुमारिपिं नानीशोभा शाक्य, हर्षलक्ष्मी शाक्य, नानीमैयाँ शाक्य, सुनिना शाक्य, अनिता शाक्य, रश्मिला शाक्य, अमिता शाक्य व मतिना शाक्य खः । वय्कःपिंमध्ये नानीमैयाँ शाक्य उमेरया कारणं व हर्षलक्ष्मी व प्रिती शाक्य देशं पिने जूगुलिं वय्कःपिनि प्रतिनिधिं भत्ता लःल्हाना कयादीगु खः ।
अथे हे पुलांपिं गणेशय् गणेश शाक्य, पुरुषोत्तम शाक्य, सञ्जु शाक्य, प्रमनराज शाक्य, कपिलरत्न शाक्य, संवेग शाक्य थःपिं हे उपस्थित जुयाः भत्ता लःल्हाना कयादीगु खःसा कन्हैया शाक्य उपस्थित जुयामदी । पुलांपिं भैरवय् इन्द्रबहादुर शाक्य, शुभरत्न शाक्य, बालपुरुषोत्तम शाक्य, श्याम शाक्य, भैरव शाक्य व रुजन शाक्य भत्ता ग्रहण यानादीगु खःसा राजु शाक्य देशं पिने जूगुलिं उपस्थित जुयामदिल ।
थौंकन्हय् कुमारिया आसनय् च्वनाबिज्याम्ह तृष्णा शाक्य खः । वसपोलयात नं महानगरं लय् न्यय्द्वः भत्ता उपलब्ध याकेगु याना वयाच्वंगु दु । थुकथं हे कुमारिया चिताइदार ज्ञानदेवी शाक्ययात नं पुजा खर्च व पारिश्रमिक वापत न्यय्द्वः तका उपलब्ध याका वयाच्वंगु दु ।
येँ महानगरं आर्थिक दँ ०७०÷७१ निसें पुलांपिं कुमारि, गणेश व भैरवयात श्रीपद भत्ता लःल्हायेगु व्यवस्था याःगु खः । महानगरं श्रीकुमारियात लय् झिंच्याद्वः, श्रीगणेश व श्रीभैरवयात लय् झिंन्याद्वः श्रीपद भत्ता लःल्हायेगु याना वयाच्वंगु दु ।
येँ महानगर उपप्रमुख डंगोलं भत्ता लःल्हानादिसें पुलांपिं श्रीकुमारियात आवास व्यवस्थापनया निंतिं येँ महानगरं कुतः यानाच्वंगु धासें परम्परा ल्यंकेगु निंतिं सरकारं यायेमाःगु ज्या व दायित्व महानगरं पूवंकेगु कुतः यानाच्वंगु दु धयादिल ।
LEAVE YOUR COMMENTS