एमालें प्रमुख प्रतिपक्षीयाके समेत विश्वासया मत फ्वनीगु

येँ (नेपालभाषा टाइम्स)- प्रधानमन्त्री केपी शर्मा ओलीं प्रतिनिधिसभाय् दुथ्याःगु फुक्कं राजनीतिक दलतय्त विश्वासया मत बीगु नितिं अपिल याइगु खँ सत्तारुढ दलया प्रमुख सचेतक महेश बर्तौलां कनादीगु दु ।

प्रधानमन्त्री केपी ओलीं कंस साउन ६ गते आइतवाः विश्वासया मत कायेगु नितिं संसद सचिवालययात औपचारिक पौ च्वयेधुंकूगु दु । प्रमुख सचेतक बर्तौलां पार्टी नेतातय्त पौ च्वयाः मत फ्वनेगु खः कि नापलानाः मत फ्वनेगु धइगु बारे सहलह जुयाच्वंगु धासें सार्वजनिक रुपय् अपिल यायेधुनागु खँ नं कनादीगु दु ।

वय्कलं माओवादी केन्द्र सहित प्रतिपक्षी दलयात नं विश्वासया मत बीगु नितिं इनाप यानागु धासें राष्ट्रिय सहमतिया सरकार नीस्वनेगु जूगुलिं फुक्कं दलं सरकारयात समर्थन यायेबलय् सकारात्मक सन्देश वनीगु जूगुलिं दलतय्सं थुकियात कयाः बिचाः यायेमाःगु खँ नं धयादीगु दु  । नेपाली कांग्रेसया समर्थनय् एमाले अध्यक्ष ओली वंगु असार ३० गते प्रधानमन्त्री नियुक्त जुयादीगु खः ।

प्रधानमन्त्री ओलीयात कांग्रेस, एमाले, जसपा, लोसपा, जनमत व नागरिक उन्मुक्ति पार्टीं विश्वासया मत बीगु निर्णय यायेधुंकूगु दुसा जसपा नेपाल नं विश्वासया मत बीगु खँय् सकारात्मक खनेदु ।
मेखे माओवादी केन्द्र, रास्वपा व नेकपा एकीकृत समाजवादीं धाःसा वर्तमान सत्ता समीकरण देय्यात प्रतिगमनपाखे यंकेगु योजना कथं गठन जूगु धासें प्रधानमन्त्री ओलीयात थःपिंसं विश्वासया मत मबीगु खँ धया वयाच्वंगु दु ।

वर्तमान सरकारं संविधान संशोधन यायेगु धकाः समेत एजेण्डा दयेकातःगु जुयाः संविधान संशोधन यायेगु खःसा फुक्क दलया समर्थन कायेमाःगु आवश्यकता दु । माओवादी, नेकपा (एसं) संविधान संशोधनया मुद्दायात आलोचना याना वयाच्वंगु दुसा यदि संघीय लोकतान्त्रिक गणतन्त्र व समावेशीकरण विरुद्ध संशोधनया कुतः जुल धाःसा संघर्ष यायेगु धयाच्वंगु दु ।

लेखा समितिइ माओवादीया दावी
प्रमुख प्रतिपक्षी दल माओवादी केन्द्रं संसदया सार्वजनिक लेखा समितिया सभापति पद थःपिंत बीमाः धकाः माग याःगु दु । म्हिगः सिंहदरबारस्थित संसद सचिवालयय् सभामुख देवराज घिमिरें सःतूगु थीथी दलया मू सचेतक व सचेतकया बैठकय् माओवादीं उगु माग याःगु खः । बैठकय् ब्वति कासें माओवादी केन्द्रया प्रमुख सचेतक हितराज पाण्डें लेखा समिति प्रतिपक्षी दलयात बीगु प्रचलन दुगु धासें थःगु दलयात उगु समितिया सभापति दयेकेमाः धकाः माग यानादीगु खः । पाण्डें सार्वजनिक लेखा समिति प्रतिपक्षी दलयात बीमाःगु व अज्याःगु समितिया नेतृत्व सरकारय् दुगु दलं मकाइगु प्रचलन पालना यायेमाःगु खँ नं धयादीगु दु । लुमंकेबहः जू, जू, थ्व स्वयां न्ह्यः थ्व पद एमालेयात बियातःगु खः ।