जग्गा लित कायेत सतकय् हे तारबार
सतक विभागपाखें जबर्जस्ति जग्गा कब्जा
येँ (नेपालभाषा टाइम्स)/ धादिङया धार्केया बिमला महर्जनया जग्गा सतक विभागं जबजस्ती कब्जा यानाः पीच यायेवं नेवाः राष्ट्रिय परिषदया नेतृत्वय् स्थानीय वासिन्दां म्हीग उगु पीच यानातःगु लँय् हे तारबार ग्वःगु दु । निजी जग्गा मिचे यानाः मापदण्ड अःखः सतकय् पीच याःगु धासें अन सतकया दथुइ हे पँ थनाः तारबार तःगु खः ।
नेवाः राष्ट्रिय परिषदया अध्यक्ष सुमन साय्मिं धुनिबेसी नगरपालिका–५ य् च्वंगु बिमला महर्जनया ३ रोपनी १५ आना २ पैसा जग्गाय् मापदण्ड अःखः पीच याःगुलिं न्यायया निंतिं थःपिंसं सांकेतिक रुपं तारबार ग्वयागु खँ कनादीगु दु । वय्कलं धयादिल, ‘लँया निंतिं बीमाःगु जग्गा बाहेक ल्यं दनीगु जग्गा जग्गाधनी विमला महर्जनयात हे लित बीकेगु निंतिं तारबार ग्वयागु खः । वय्कलं बियादीगु जानकारी कथं अन वैकल्पिक लँ दयेक दयेकं हे पीडित महर्जनया जग्गाया दथुं लँ पिकयाः पीच यायेगु ज्या जूगु खः ।
पीडित महर्जनं थःपिनिगु जग्गाय् छुं हे जानकारी तकं मबिसे पीच यायेगु, गुकिं थः अन्यायय् लाःगु खँ धयादीगु दु । वय्कलं सरकारं थःपिं च्वनेगु थाय् तकं मदयेक जग्गा कब्जा याःगु धासें सम्बन्धित निकाययात जानकारी याकागु इलय् कर्मचारीतय्सं ‘छिकपिंत अन्याय जूगु खः’ धकाः धायेगु यानाच्वंसां नं समस्या समाधानया निंतिं स्थानीय सरकार लिसें स्थानीय प्रशासनं ध्यान मबिउगु खँ धयादीगु दु ।
वय्कलं वंगु दत्या न्ह्यवंनिसें थीथी राजनीतिक पार्टीया नेतात लिसे नं ग्वाहालि फ्वनागु खःसां नेतातय्सं थःत आश्वासन जक बिउगु खँ धयादिल । म्हीगः तारबार ग्वयेवं खानीखोलाया प्रहरीं वय्कःयात सम्बन्धित निकायय् वनेत धाःगु खः । तर थःम्हं थ्व खँ फुक्क थासय् थ्यंके धुनागु जानकारी बीवं प्रहरी नं उगु थासं लिचिला वंगु खँ नं वय्कलं कनादीगु दु ।
थ्वहे झ्वलय् नेवाः राष्ट्रिय परिषदया अध्यक्ष साय्मिं म्हिगः हे सडक विभागया महानिर्देशक डा. विजय जैसी लिसे खँल्हाबल्हा यानादीगु दु । खँल्हाबल्हाया झ्वलय् महानिर्देशक जैसीं पीडित बिमलायात अन्याय जूगु खँ स्वीकार यानादीगु खँ अध्यक्ष साय्मिं जानकारी बियादीगु दु । तर महर्जनयात अन्याय जूगु खःसा जग्गा लित बिउ धकाः थम्हं तयागु प्रस्तावय् धाःसा महानिर्देशक जैशीं मुद्दा तयेत सुझाव बिउगु खँ कनादिल ।
LEAVE YOUR COMMENTS