राष्ट्रिय सभाय् छम्ह जक नेवाः ,राजनीतिक दलतय्सं समावेशी सिद्धान्त नाला मकाल
येँ – नकतिनि क्वचाःगु राष्ट्रिय सभाया चुनावय् देय्न्यंकं यानाः मुक्कं छम्ह जक नेवाः उम्मेदवार त्याना वःगु दु । थुकथं ५९ म्ह दुजः दुगु राष्ट्रिय सभाय् आः नेवाः सांसद छम्ह जक दइगु जूगु दु । राष्ट्रिय सभाय् आः छम्हयां छम्ह जक नेवाः सांसदया रुपय् भैरवसुन्दर श्रेष्ठ जक थ्यंगु दु । वय्कः प्रदेश नम्बर ६ पाखें नेकपा एमालेया उम्मेदवार जुयाः त्याना वःगु खः । राष्ट्रिय सभाय् उम्मेदवारी बीगु हैसियत दुपिं राष्ट्रिय मान्यता प्राप्त पार्टीतय्सं थ्व चुनावय् नेवाः नेता कार्यकर्तायात उम्मेदवार हे मदयेकूगु कारणं चुनावय् नं त्याना मवःगु खः ।
नेवाःतय् बाहुल्यता दुगु ३ नम्बर प्रदेशपाखें छुं हे पार्टीं नेवाःयात उम्मेदवार मदयेकू । समावेशी सिद्धान्त कथं नं ३ नम्बर प्रदेशपाखें कम से कम छम्ह नेवाः व छम्ह तामाङ उम्मेदवार पिहां वये माःगु खः । तर एमाले, माओवादी, कांग्रेस सुनां हे नेवाः उम्मेदवार मथं । सूत्रं धाः कथं एमालेपाखें छम्ह नेवाःयात थने फइगु स्थिति वःगु खःसा पार्टीया ३ नम्बर प्रदेशं नकतिनि घरेलुया जागिर त्वःताः रिटायर्ड जूम्ह उदया शर्मा पौडेलयात उम्मेदवारया लागिं सिफारिस याना छ्वःगु खः ।
माओवादीं थः वरिष्ठ नेता रामबहादुर थापा (बादल) यात ३ नम्बरं हे उम्मेदवार दयेकूगु खःसा कांग्रेसया उम्मेदवार वरिष्ठ अधिवक्ता राधेश्याम अधिकारीयात विवेकशील साझा पार्टीया समेत भोट कयाः त्याका छ्वःगु खः । राष्ट्रिय सभाया ५९ म्ह दुजः मध्ये ५६ म्ह चुनावपाखें निर्वाचित जुया वयेधुंकूगु दुसा ल्यं दुपिं स्वम्ह सरकारया सिफारिस कथं नियुक्त याइगु प्रावधान दु । थ्व स्वम्ह दुजलय् कांग्रेस सरकारं चुनावय् बूपिं रामचन्द्र पौडेल, विमलेन्द्र निधि व आरजु देउवायात मनोनयन यायेत्यंगु चर्चा दु । न्हापा न्हापा राष्ट्रिय सभायात छुं ज्या बियातःगु मदुसां थुपालय् धाःसा राष्ट्रिय सभायात छुं नं विधेयक न्हापांखुसी पेश यायेगु न्हापांगु सभाया रुपय् न्ह्यःने हयातःगु दु । थुकियात विधेयक उत्पत्ति जुइगु संसदया रुप बिया तःगु दु ।
LEAVE YOUR COMMENTS