ने. सं. ११४४ कौलाथ्व पारू - नःलास्वनेगु

आः न्हूगु यातायात सिन्डिकेट

सवारी साधनत कम्पनीइ दर्ता लिपा समितिइ नं दर्ता

येँ – सरकारं यातायात सिन्डिकेट मदयेधुंकूगु दावी यानाच्वंगु इलय् यातायात व्यवसायीतय्सं धाःसा आः हानं चाःहिकाः उकियात निरन्तरता बीगु तयारी यानाच्वंगु खँ सीदुगु दु ।व्यवसायीं कम्पनी रजिष्ट्रार कार्यालयय् दर्ता जूगु फुक्कं यातायात कम्पनीयात समितिइ दर्ता याकाः सिन्डिकेटयात न्हू कथं सञ्चालन यायेगु तयारी यानाच्वंगु खः ।सरकारं समितिया नवीकरण खारेज यायेधुनागु खँ धायेगु यानाच्वंगु दु ।

तर व्यवसायीं धाःसा कम्पनीइ दर्ता जूगु फुक्कं संस्थायात समितिइ नं दुथ्याकाः सिन्डिकेटयात निरन्तरता बीगु कुतः यानाच्वंगु खँ स्रोतं धाःगु दु । सिन्डिकेटयात निरन्तरता बीगु निंतिं भौतिक पूर्वाधार तथा यातायात मन्त्री रघुवीर महासेठ नं सकारात्मक जूगु खँ नं स्रोतं धाःगु दु ।

थःगु नां कने चाहे मजूम्ह छम्ह यातायात व्यवसायीं धाःकथं फुक्कं व्यवसायी कम्पनी मोडेलय् वंसां अन दर्ता जूगु संस्था हाकनं समितिइ नं दर्ता यायेमाःगु व्यवस्था यायेत्यंगु दु । फुक्कं व्यवसायी कम्पनी दर्ता जुइधुंकाः समितिया नामय् दुगु बैंक खाता चायेकेत अःपुकेगु निंतिं व्यवसायी कम्पनीइ दर्ता यायेत्यंगु खः । थीथी समितिया नामय् बैंकय् २ अर्ब तका स्वयां अप्वः ध्यबा दु गुगु सरकारं रोक्का यानातःगु दु ।

बैंक खाता चायेकेगु निंतिं भौतिक पूर्वाधार तथा यातायात मन्त्रालय व गृह मन्त्रालयं मंकाः कथं अर्थ मन्त्रालययात पौ च्वयेधुंकूगु दु । यातायात समितिया नामय् बैंकय् दुगु खाता चायेकेगु खँय् प्रधानमन्त्री नं सकारात्मक दुुगु खँ धाःगु दु । प्रधानमन्त्री केपी ओलीयात व्यवसायीत थःपिंसं हे थुकी कन्भिन्स याःगु खँ धाःगु दु । उकिया निंतिं व्यवसायीतय्सं दकलय् न्हापां फुक्कं यातायात व्यवसायीयात कम्पनीइ यंकेगु बचं प्रधानमन्त्रीयात बिउगु व उगु बचं कथं बैंक खाता चायेकेत वय्कः सकारात्मक जुयादीगु खः ।

भाः थकायेवं बुकिङ खुल्ला
नेपाल यातायात व्यवसायी राष्ट्रिय महासंघं मंगलवाःनिसें मोहनियात लक्षित यानाः गाडीया अग्रिम टिकट बुकिङ याइगु जूगु दु । सार्वजनिक यातायातया भाः थकायेगु सहमति लिपा व्यवसायीत अग्रिम बुकिङ खुल्ला यायेत तयार जूगु खः ।

महासंघं देय्न्यंकं बुकिङ खुल्ला यायेत पत्राचार यायेधुंकूगु दु । मोहनिया निंतिं थीथी जिल्लाय् सवारी साधन म्हो जुल धाःसा येँय् च्वंगु सवारी साधन नं चले यानाः सेवा बीगु खँ धाःगु दु । मोहनिया न्ह्यःने वयाः व्यवसायीतय् दबाबय् सरकारं १० प्रतिशत यातायात भाडा थकाःगु खः ।