आमा घरयात हलिं नेवाः दबूया पहलय् ग्वाहालि

येँ – विश्व न्यंकं महामारी कथं न्यनाच्वंगु कोरोना भाइरसं यानाः हाःनाः मदुपिं ज्याथजिथिपिंत हयाः सेवा याना वयाच्वंगु आमा घरयात नं समस्या जुइवं हलिं नेवाः दबू (डब्ल्युएनओ)या पहलय् ग्वाहालि जूगु दु ।

हलिं नेवाः दबूया नायः सिजन श्रेष्ठया पहलय् आमा घरया निंतिं अमेरिकाया मेरिल्यान्डय् च्वनादीम्ह सुमन कुमार सिंहं (सुमन नेवाः) छ्वयाहःगु द्वःछि डलर (१ लाख २० हजार तका) आइतवाः आमा घरया संचालक दिलशोभा श्रेष्ठयात लःल्हाःगु दु ।

हलिं नेवाः दबू नेपाः च्याप्टरया नायः शाक्य सुरेन व दांभरिं सुरेन्द्र भक्त श्रेष्ठं वय्कःयात थुगु दां लःल्हानादीगु खः ।

ग्वाहालिं दां लःल्हाना कयादिसें आमा घरया संचालक समाजसेवी दिलशोभा श्रेष्ठं थज्याःगु परिस्थितिइ नं अमेरिकां निसें ग्वाहालि ध्यबा छ्वयाहःगु खँय् लसता प्वंकादिसें हलिं नेवाः गुथि व ध्यबा छ्वयाहयादीम्ह सुमन नेवाःजुयात सुभाय् बियादीगु दु ।

थ्व झ्वलय् वय्कलं थः कारोनाया महामारीया अवस्थाय् नं थःपिंसं लँय् हाःनाः मदयेक च्वनाच्वंपिं ज्याथजिथिपिंत हयाः सेवा बिया च्वनागु खँ धयादिल । लँय् लानाच्वंपिं ज्याथजिथिपिंत प्रहरीं आमा घरय् तयेहयेवं झिंप्यन्हु तक बिस्कं हे क्वथाय् तयाः हेरचाह यानाः आः आमा घरय् हे आश्रय बिया वयाच्वनागु खँ वय्कलं कनादीगु खः ।