सरकार पुनर्गठनया निर्णय : आःया पुनर्गठनय् जातीय, लैंगिक, क्षेत्रीय समीकरण

येँ (नेपालभाषा टाइम्स) – पूर्व माओवादीया मुख्यालय जुयाच्वंगु पेरिसडाँडाय् म्हिगः न्हापांखुसी च्वंगु नेकपाया सचिवालय बैठकं माओवादी शैलीया हे ‘क्रान्तिकारी’ निर्णय याःगु दु। बैठकं प्रधानमन्त्री केपी ओली नेतृत्वय् दुगु संघीय सरकार लगायत नेकपां नेतृत्व यानाच्वंगु खुगुलिं प्रदेशया सरकार पुनर्गठन यायेगु निर्णय याःगु दु ।

मन्त्रिमण्डल पुनर्गठन बारे पार्टी दुने ताःई न्ह्यवंनिसें वहस जुयाच्वंगु खःसा म्हिगःया बैठकं मन्त्रिमण्डल पुनर्गठन याना हे छ्वयेगु धकाः निर्णय याःगु खः । आः पुनर्गठन जुइगु मन्त्रिमण्डलय् थीथी जाति, प्रदेश, लिंगया समेत समीकरण मिले यायेगु धकाः नं सहमति कायम याःगु दु । थौंकन्हय् गठन जुयाच्वंगु संघीय सरकारंनिसें छुं हे प्रदेश सरकारय् तकं जातीय, लैंगिक, क्षेत्रीय समीकरण मिले मजू धकाः ताः ई न्ह्यवंनिसें सः थ्वया वयाच्वंगु खः ।

आः मन्त्रिमण्डल पुनर्गठन यायेबलय् गज्याःपिंत मन्त्री दयेकेगु व गज्याःपिंत विदा बिया छ्वयेगु धइगु खँय् छगू क्राइटेरिया दयेकेगु नं सहमति जूगु दु। अज्याःगु क्राइटेरियाया लागिं अन स्वंगू विकल्प वःगु खः । आः दुपिं फुक्क हे मन्त्रीतय्त चीकाः सकलें न्हूपिं हयेगु वा निदँ मन्त्री जुइधुंकूपिंत चीकाः उमिगु थासय् न्हूपिं हयेगु वा बांलाक ज्या याःपिंत कायम यानाः मेपिंत जक चीकेगु धइगु नं खँ पिहां वःगु दु। थुकिया बारे पार्टीं प्रधानमन्त्रीलिसे सल्लाह यानाः ज्या न्ह्याकी धाःगु दु ।

म्हिगःया बैठकय् वामदेव गौतमयात राष्ट्रिय सभाय् मनोनित यायेगु ज्यां जनताय् बांमलाःगु सन्देश वन धकाः नं अनौपचारिक खँ पिहां वःगु खः । तर उकी नेतातय्सं खास टिप्पणी धाःसा मयाःगु खँ सूत्रं धाःगु दु ।

पेरिस डाँडाय् बैठकया अर्थ
पुष्पकमल दाहालया ल्हातय् पार्टीया नेतृत्व वयेवं न्हापांगु सचिवालय बैठक पूर्व माओवादीया ज्याकू तयातःगु पेरिसडाँडाय् जूगु खँयात कयाः राजनीतिक ख्यलं थीथी अर्थ छ्याना हःगु दु। थ्व स्वयां न्ह्यः नेकपाया हरेक बैठक प्रधानमन्त्री निवास वालुवाटारय् जुया वयाच्वंगु खःसा थुकिं यानाः सरकारी स्रोतया दुरुपयोग यात धकाः नं द्वपं वयाच्वंगु खः । लिसें दाहालं पेरिसडाँडाय् सचिवालय बैठक सःताः पार्टी एकीकरण लिपा ध्याकुनय् लाः वंगु पूर्व माओवादीया छबीयात हानं छक्वः च्वय् थत हयेत कुतः याःगु अर्थय् नं थुइका हःगु दु। पेरिसडाँडाया उगु बैठक करिब ४ घन्टा न्ह्याःगु खः । बैठकय् प्रधानमन्त्री केपी शर्मा ओली पूवंक हे च्वनादीगु खः । वालुवाटारय् वय्कः पूवंक बैठकय् च्वनेगु यानामदी ।

सम्बन्धित बुखँ

LEAVE YOUR COMMENTS