मयुरवर्ण विहारया दिगिछेँ उलेज्या
यल – यलया ऐतिहासिक मयुरवर्ण महाविहार (भिन्छेबहाः) या धर्मागार दिगि पुनर्निर्माण लिपा आइतवाः उलेज्या जुल । भारतीय राजदूत मञ्जिप सिंह पुरीं दिगिया उलेज्या यानादीगु खः । थुगु दिगि ‘ललितपुर विकासको लागि समाज’या संयोजनय् भारतीय सरकारया आर्थिक ग्वाहालि व यल महानगरपालिकाया प्राविधिक ग्वाहालिं दयेकूगु खः ।
मयुरवर्ण महाविहारया आजु धर्मवज्र वज्राचार्यया सभापतित्वय् जूगु ज्याझ्वलय् लसकुस यानादिसें समाजया नायः व पुलांम्ह मन्त्री बुद्धिराज वज्राचार्यं यलया महत्वपूर्ण सम्पदा संरक्षण व पुनःनिर्माणया निंतिं समाजया पहलय् जक भारत सरकारं च्यागू करोडया ग्वाहालि वयेधुंकूगु खँ कनादिल । थ्व ग्वाहालि ध्यबां समाजया संयोजनय् झिंखुगू सम्पदा पुनःनिर्माण ज्या क्वचायेकेधुनागु खँ वय्कलं कनादिल ।
समाजया संयोजनय् भारतीय सरकारया आर्थिक ग्वाहालिं शंखमूलघाटया पुनर्निर्माण, दौबहालय् कलात्मक लुखा तयेगु, यलमुल त्वालय् चपाःया पुनर्र्निर्माण, इन्द्रायणी पार्क दुने फल्चा दयेकेगु, मछिन्द्रबहाः दुने क्यब दयेकेगु, नःबहालय् गमला तयेगु, लोककीर्ति महाविहारया मर्मत व विस्तार, नापीचन्द्र महाविहारया पुनःनिर्माण, नागबहाःया टोल सुधार भवन, भिंद्यःलाछिया चपाः, लुखुसिया फल्चा, नबहाःया आगंछेँ, श्रीबच्छ महाविहारया आजु छेँ, मयुरवर्ण महाविहारया दिगि छेँ पुनर्निर्माण जुइधुंकूगु खँ वय्कलं कनादिल ।
अथेहे आः मेगु ज्या न्ह्याकेगु निंतिं भारतीय दूतावासय् प्यंगू करोड ९० लाख तकाया प्रस्ताव छ्वयातये धुनागु खँ नं वय्कलं कनादिल ।
ज्याझ्वलय् धर्मागार पुनर्निर्माण समितिया सचिव विनोद कुमारं प्रगति प्रतिवेदन न्ह्यब्वयादीगु खः ।
LEAVE YOUR COMMENTS