राजदूतं मन्त्रीत नापलात, कुटनीतिक मर्यादाया उल्लंघन

येँ – प्रधानमन्त्री केपी ओलीया नेतृत्वय् सरकार गठन जुइवं कर्मचारी व थीथी निकायतय्त कडा निर्देशन बीगु ज्या यानाच्वंसां स्वयम् वय्कःया हे सरकारय् च्वंपिं मन्त्रीतय्सं धाःसा कुटनीतिक आचार संहिता तकं पालना मयासे ज्या यानाच्वंगु लूगु दु ।

प्रम ओलीं सरकारयात पूर्णता बीवं हे नेपाःया लागिं भारतीय राजदूत मन्जिद सिंहं तप्यंक सिंहदरवारय् वनाः थीथी मन्त्रीतय्त नापलायेगु ज्या याःगुलिं कुटनीतिक ख्यःया मनूतय्सं थ्व कुटनीतिक मर्यादाया उल्लंघन जुल धकाः टिप्पणी याना हःगु दु ।

नेपाःस्थित थीथी विदेशी कुटनीतिक नियोगया पदाधिकारीतय्सं नेपाःया मन्त्री, प्रधानमन्त्रीतय्त थः यःयःथे नापलायेगु ज्या याना जुल धकाः परराष्ट्र मन्त्रालयं २०६८ सालय् ‘कुटनीतिक आचार संहिता’ हे दयेका तःगु दु । थ्व आचार संहिता कथं नेपाःस्थित छुं हे देशया दूतावासया राजदूत वा मेपिं पदाधिकारीतय्सं नेपाःया सुं नं मन्त्री वा मन्त्रालयया पदाधिकारीतय्त तप्यंक नापलाये दइ मखु । नापलायेगु खःसा परराष्ट्र मन्त्रालययाके स्वीकृति कयाः जक नाप लाये फइ । अथे नापलाः वनीबलय् नं परराष्ट्र मन्त्रालयया छम्ह पदाधिकारी नं नापं दइ गुम्हेस्यां मन्त्री व राजदूत दथुइ जूगु खँल्हाबल्हाया टिपोट दयेकाः परराष्ट्र मन्त्रालयय् तया तइ । लिपा हानं गनं रिफरेन्स माल धाःसा उकियात प्रयोग याये फयेमा धकाः थ्व प्रावधान दयेकातःगु खः । तर नेपाःया मन्त्रीत थःपिंसं हे उकिया पालना धाःसा याःगु खने मदु ।

भारतीय राजदूत मन्जिद सिंहं म्हीग सिंहदरवारय् वनाः गृहमन्त्री रामबहादुर थापा, परराष्ट्र मन्त्री प्रदिप ज्ञवाली, संस्कृति तथा नागरिक उड्डयन मन्त्री रवीन्द्र अधिकारी व भौतिक योजना मन्त्री रघुवीर महासेठयात व्यक्तिगत रुपं नापलानादीगु खः । धायेत वय्कलं मन्त्री जूगुलिं बधाई बीत नापलाःगु धाःसां थ्वहे प्यम्ह मन्त्रीयात जक छाय् नापलात धइगु खँ पिहां वःगु दु ।

सम्बन्धित मन्त्रीतय्सं धाःसा राजदूत सिंह आकाझाकां वयाः नापलाः वःगुलिं नापलानागु खः धासें थप खँ धाःसा कनामदी । कुटनीतिक मर्यादा बारे न्हापा लिपा थःपिंसं

हे न्ह्यसः तयेगु यानाच्वंपिं नेतातय्सं नं थः मन्त्री जूगु इलय् धाःसा उकियात वेवास्ता याःगु टिप्पणी नं याना हःगु दु ।

परराष्ट्र मन्त्री प्रदिप ज्ञवालीं नं थः मन्त्री नियुक्त जुइवं भारतीय विदेशमन्त्री सुषमा स्वराजं फोन यानाः बधाई बियाहःगु खँ थम्हं हे फेसबुकय् मार्फत सार्वजनिक यानादीगु खः । कुटनीतिक ख्यःया मनूतय्सं धाःसा थज्याःगु खँ मन्त्री थम्हं हे कना जुइगु मखु, मन्त्रालयया सम्बन्धित च्यानल मार्फत वयेमाःगु खः धकाः टिप्पणी यानाच्वंगु खः ।