ने. सं. ११४६ अनलाथ्व नवमी -

सरकार–ठेकेदार हानं विवाद

येँ – थीथी कारणं यानाः थानाच्वंगु राष्ट्रिय महत्वया १८०० गू परियोजना याकनं सिधयेकेगु लागिं सरकारं पलाः न्ह्याकूगु दु । तर सरकारं परियोजना याकनं सिधयेकेगु धकाः पहल याःसां सम्बन्धित ठेकेदारतय्सं धाःसा परियोजनाया लागिं माःगु ध्यबा हे सरकारं इलय् निकासा मयाइगु कारणं खाली म्हुतुं जक धयां मगाः धया हःगु दु ।

ज्या सम्पन्न जुइमाःगु खःसां नं इलय् सिमधयाः थानाच्वंगु थ्व १८०० गू परियोजनाया लागिं १४० अर्ब तका खर्च यायेमाःगु आवश्यकता दु । यदि सरकारं याकनं सिधयेकेगु खःसा ६५ अर्ब तका दां तुरुन्त हे निकासा यायेमाःगु खनेदु । तर सम्बन्धित कर्मचारीतय्सं थःत वयेमाःगु कमिशन ल्हातय् मलाःतले चेक काटे मयाइगु, काटे याःसां ठेकेदारयात मबिसे झुले याना तइगु कारणं ज्या न्ह्याके मफयाच्वंगु द्वपं ठेकेदारतय्सं बिउगु दु ।

सरकारं थ्व परियोजनात सिधयेकेगु लागिं ठेकेदारतय्त ‘अन्तिम मौका’ धासें फुक्क हे परियोजनाया म्याद थप याना बिउगु खः । म्याद थप याःगु फुक्क परियोजना मध्ये १२०० गू योजना ला भौतिक पूर्वाधार मन्त्रालय अन्तर्गत लाःगु सडक विभागयागु दु । थ्व म्याद थपे यायेगु लागिं सरकारं निर्माण सम्बन्धी कानून हे संशोधन याःगु खः ।

तर ठेकेदारतय्सं धाःसा म्याद थप जक यानां मगाः, ध्यबा नं निकासा यायेमाः धकाः सः तया हःगु दु । ठेकेदारतय् कथं सिधयेधुंकूगु ज्यायागु भुक्तानी तकं आः तक काये फयाच्वंगु मदुनि । यदि आः नं सरकारं ध्यबा निकासा मयात धाःसा थुकिया लिच्वः परियोजनाय् जक मखु, देय्या मुक्कं अर्थतन्त्रय् हे लाइगु ख्याच्वः समेत बिउगु दु ।

यदि सरकारं इलय् हे ध्यबा निकासा यात धाःसा आः दथुइ थानाच्वंगु १८०० गू परियोजना मध्ये ७० प्रतिशत योजना थ्वहे दँय् सिधयेके फइगु खँ धाःगु दु । ल्यं दुगु ३० प्रतिशतया लागिं मेगु छुं दँ कायेफुगु खँ धाःगु दु । सरकारं धाःसा तुरुन्त बीगु लागिं ५ अर्ब तका दां फ्याःगु खँ सीदुगु दु ।

मू जिम्मेवार भ्रष्ट कर्मचारी

विकास निर्माणया गुलि नं परियोजना थौंकन्हय् दथुइ थानाच्वंगु खः, उकिया मू दोषी कमशिनखोर व भ्रष्ट कर्मचारी जूगु खँ धायेगु याः । ठेकेदारयात भुक्तानी यायेगु जिम्मेवारी दुपिं कर्मचारीतय्सं थःत वयेमाःगु कमिशन मवःतले चेक तकं सुचुका बीगु कारणं ज्या दथुइ थाइगु जुयाच्वंगु दु । मेलम्ची परियोजनाय् इटालियन ठेकेदार बिसिउँ वंगुया कारण नं उमित सिधःगु ज्याया ध्यबा तकं मबिउगुलिं खः । म्हीग तिनि येँया भद्रकालीइ नं नेपाली सेनाया भवन निर्माण याःगु ध्यबा मबिउ धकाः ज्यामितय्सं जंगी अड्डाया न्ह्यःने धर्ना बिउगु खः । छुं जुयाः ठेकेदारं इलय् ज्या सिमधयेकल वा अप्वः ध्यबा माग यात धाःसा अज्याःगु ज्या तकं कर्मचारीं ध्यबा नयाः मिले याना छ्वइगु खँ जगजाहेर जुयाच्वंगु दु ।