स्कुल–स्कुलय् तयातःगु सटर येँ मनपां बन्द याकल

येँ (नेपालभाषा टाइम्स)- येँ महानगर दुनेया थीथी स्कुलं बालं तयातःगु सटर येँ महानगरपालिकां बन्द याकूगु दु । महानगरया शिक्षा शाखाया अधिकृत इन्द्रप्रसाद दाहालया कथं म्हिगः प्यंगू स्कुलया सटर बन्द याःगु दु । येँ मनपां म्हिगः पद्मोदय, शहीद शुक्र, पद्मकन्या व विजय स्मारक स्कुलं बालं बियातःगु सटर बन्द याकूगु खः । थ्व स्वयां न्ह्यः आदर्श आधारभूत विद्यालयया सटर नं येँ मनपां बन्द याकेधुंकूगु दु ।

स्कुलया सटर स्कुलया प्रयोजनया निंतिं जक छ्यलेमाः धासें येँ मनपां बालं बियातःगु पसः बन्द याकूगु खः । विद्या–लय सञ्चालनय् वइगु आर्थिक भार येँ मनपां हे बीगु धासें सटर बन्द याःगु खः । दाहालया कथं सटर बालं बियाः उकिया ध्यबां सञ्चालन यानाच्वंगु स्कुलय् अध्ययन यानाः आवश्यक ध्यबा येँ मनपां हे बीगु तयारी जुयाच्वंगु दु ।

येँ मनपां वंगु असोजं हे स्कुलतय्सं बालं बियातःगु सटर खाली यायेत सुचं बिउगु खः । येँ मनपां उबलय् हे बालं बियातःगु सटर बन्द याकेबलय् लाइगु आर्थिक भारया विवरण बीत नं निर्देशन बिउगु खः, तर स्कुलतय्सं उकियात वेवास्ता याना वयाच्वंगु खः ।

येँया मू सतकय् लानाच्वंगु आपालं धइथें स्कुलं सटर पिकयाः बालं बिया वयाच्वंगु दु । स्कुलतय्सं बालं वःगु ध्यबां हे थप शिक्षकतय् खर्च व्यवस्थापन यानागु दु धायेगु याः । तर आपालं थासय् धाःसा प्रधानाध्यापक व विद्यालय व्यवस्थापन समितियापिनि मिलोमतोय् स्कुलया मैदान हे स्यंकाः छेँ दनाः नं बालं बिया वयाच्वंगु दु । थँबहीया जुद्धोदय स्कुलय् स्कुलया मैदानय् छेँ दनाः बालं बिउगु खः । गुलिखे स्कुलय् अथे बाः वइगु ध्यबाय् कमिशन नये दइ धकाः स्कुल व्यवस्थापन समितिइ च्वनेगु लागिं शिक्षक व स्थानीय राजनीतिक नेतातय् दथुइ धेंधेंबल्लाः समेत जुइगु खः ।

येँ मनपाया कथं येँया ३७ गू स्कुलं सटर बालं बिया वयाच्वंगु दु ।