पेस्तोल क्यंम्ह प्रहरी विरुद्ध छानबिन
येँ (नेपालभाषा टाइम्स)÷सक्व नगरपालिका बोझनी धाःगु थासय् जूगु आन्दोलनय् वःपिं स्थानीय मनूतय्त पेस्तोल ताके याःम्ह इन्स्पेक्टर विशालबहादुर बुढाथोकीबारे छानविन शुरु याःगु दु ।
सक्वया शंखरापुर नगरपालिका ३ स्थित बोझनीइ विद्युत सबस्टेशन दयेकेत्यंगु विरोधय् स्थानीय मनूतय्सं प्रदर्शन याना वयाच्वंगु दु । वंगु शुक्रवाः जूगु प्रदर्शन नियन्त्रण यायेत बौद्धया प्रहरी टोली नं खटे जूगु खः । उगु टोलीया प्रहरी निरीक्षक बुढाथोकीं प्रदर्शनकारीतय्त ‘गोलीं कयेके ला ?’ धकाः पेस्तोल ताके याःगु खः । बुढाथोकीं अन गैरव्यवसायिक ज्या याःगु धासें वयागु विरुद्ध छानविन जूगु खः ।
बोझनीइ नेपाल विद्युत प्राधिकरणं दयेकेत्यंगु विद्युतीय सबस्टेसनं विकासया नामय् आदिभूमि लाकाः थःपिंत विस्थापित यायेत्यंगु धासें आन्दोलन याना वयाच्वंगु खः । थ्वहे झ्वलय् स्थानीय वासिन्दाया आन्दोलनयात बृहत नागरिक आन्दोलनं नं समर्थन याःगु दु ।
बृहत नागरिक आन्दोलनं म्हिगः जारी याःगु विज्ञप्तिइ धयातःगु दु, ‘विकासं प्रभाव लाइपिं जनतालिसे यायेमाःगु सहमति व सहकार्ययात न्हुयाः विकासया नामय् जनतायात उठिबास यायेगु, गुगुं नं बस्ती, समुदाय वा स्थानया ऐतिहासिकता हे ध्वस्त यायेगु ज्या स्वीकार्य मदु ।’
LEAVE YOUR COMMENTS