स्रोत क्यने मफुपिं कम्पनीत बिसिउँ वन

येँ – नेपालय् लगानी याः वःपिं आपालं लगानीकर्तात थःपिनि आर्थिक स्रोत खुले याये मफयाः बिसिउँ वंगु खँ सीदुगु दु । लगानीया स्रोत खुले याये मफुपिं, कम्पनीया वास्तविक मालिक खुले यायेमफुपिं, विदेशं नेपालय् ध्यबा हःगु प्रमाण पेश याये मफुपिं लगानीकर्तात बिसिउँ वनेगु शुरु याःगु खँ नेपाल राष्ट्र बैंकं धाःगु दु ।

विदेशी लगानी दुत हयेत व लेखांकन यायेत माग यासें राष्ट्र बैंकय् वंपिं १०३ गू कम्पनी मध्ये ५४ गू कम्पनीं सरकारं क्वःछिनातःगु विवरण पेश याये मफुगु खः। उकी मध्ये अप्वः धयाथें कम्पनीतय्त लगानीया स्रोत खुले जुइगु प्रमाण पेश या धायेवं उपिं सम्पर्कबिहिन जूगु खँ
राष्ट्र बैंकं धाःगु दु ।

राष्ट्र बैंकं विदेशं ध्यबा हःगु प्रमाण पेश याये मफुगु, स्वीकृत पुँजी स्वयां अप्वः लगानीया माग यायेगु, मौज्दात क्यने मफुपिंत विदेशी लगानी दुकायेत स्वीकृति बीमफुगु खँ धाःगु दु । विदेशी लगानी दुत हयेगु व लेखांकन यायेत अनुमति माग याःगु तर स्वीकृति काये मफुगु ५४ गू कम्पनीया नां सार्वजनिक यासें राष्ट्र बैंकं सुइन्हुया दुने फुक्क प्रक्रिया पूवंकेत निर्देशन बिउगु दु ।

राष्ट्र बैंकया कथं डावर नेपाल, हुलास स्टिल थेंज्याःगु पुलांगु कम्पनीया तकं लेखांकनय् समस्या जुयाच्वंगु दु । विदेशी लगानी दुत हयेगु तर प्रक्रिया पूवंके मफुगु कम्पनीइ रियलस्टेल, खानी, उद्योग, होटल, रेष्टुरेन्ट, परामर्शदाता, कलेज, प्रविधि, कार्गो, भाषा स्यनिगु कम्पनीत दुथ्यानाच्वंगु खँ राष्ट्र बैंकं धाःगु दु ।