‘समृद्ध नेपाल’ दुने जनजाति मन्ह्यंगु दावी
येँ (नेपालभाषा टाइम्स)÷ प्रधानमन्त्री लिसें नेपाली कांग्रेसया सभापति शेरबहादुर देउवां सरकारं आदिवासी जनजातिया हितय् आपालं महत्वपूर्ण ज्या याःगु दावी यानादीगु दु । म्हिगः येँय् जूगु २८ क्वःगु विश्व आदिवासी दिवसया ज्याझ्वलय् न्ववासें वय्कलं उगु खँ धयादीगु खः ।
प्रधानमन्त्री देउवां संविधानय् न्ह्यथना तःकथं उमिगु हक, अधिकार व सुविधा बीगु खँय् नं सरकार न्ह्याबलें क्रियाशील जुयाच्वंगु दु धासें आदिवासी, जनजातिया पहिचान यायेगु, उमिगु भाषा, कला, संस्कृतिया संरक्षण व सम्वद्र्धन यायेगु नितिं थःगु नेतृत्वया सरकारं हे आदिवासी, जनजाति उत्थान प्रतिष्ठान नीस्वनागु खँ न्ह्यथनादिल ।
प्रम देउवां आदिवासी जनजातितय्त राज्यया गुगुं नं ह्वःताःपाखें बञ्चित जुइके मबीत सम्बन्धित फुक्क मिले जुयाः ज्या यायेमाःगु खँ नं धयादिल । आदिवासी जनजातिया उत्थान मजुइकं देय्यात समृद्ध यायेगु म्हगस यथार्थय् परिणत याये मफइगु खँयात आत्मसात यासें न्ह्यायेमाःगु खँय् बः बियादीगु दु ।
उकथं हे कांग्रेसया महामन्त्री गगन थापां फुक्कं आदिवासी, जनजातिया उत्थान यानाः जक देय्या समुन्नति जुइगु खँ धासें उकिं थःपिंसं गम्भीर जुयाः ज्या यानाच्वनागु दावी यानादिल । वय्कलं एमालें न्ह्यःने हःगु समृद्ध देय् दयेकेगु अभियानय् आदिवासी जनजाति मन्ह्यनीगु दावी यासें कांग्रेसं जक आदिवासी जनजातिया अधिकार व सुविधाया नितिं ज्या यानाच्वंगु खँ धयादिल । लिसें वय्कलं संविधान दयेकेगु झ्वलय् नं थःगु पार्टी जनजातिया म्हसीका हुइके मबीत नेतृत्वदायी भूमिका म्हितागु दावी यानादिल ।
LEAVE YOUR COMMENTS