आः ठेकेदारया सिन्डिकेट त्वाःथलीगु

येँ – नेपाल कम्युनिष्ट पार्टी (नेकपा) या अध्यक्ष पुष्पकमल दाहाल ‘प्रचण्डं’ तःधंपिं ठेकेदारया सिन्डिकेट त्वाःथलेगु घोषणा यानादीगु दु । थुकिया बारे प्रधानमन्त्री केपी शर्मा ओलीलिसें थःगु गम्भीर सहलह जूगु खँ नं वय्कलं कनादिल । बुधवाः चितवनया भरतपुरय् ग्वसाः ग्वःगु निर्माण व्यवसायी संघ चितवनया २५ क्वःगु वार्षिक साधारणसभाय् न्ववायेगु झ्वलय् वय्कलं उगु खँ धयादीगु खः ।

वय्कलं थम्हं तःधंगु ठेक्का पार्ट पार्ट यानाः बिउ धकाः सचिवतय्त निर्देशन बियागु खःसां नं सचिवतय्सं मन्यंगु खँ नं कनादिल । ‘सरकार व सचिवपिंत धया, पार्ट पार्ट यानाः ज्या बिउ । ज्या नं जुइ, कम्पिटिसन नं जुइ, तर जि सफल जुइमफुत’ वय्कलं धयादी । वय्कलं धयादी, ‘माने मजू सचिवत । सेटिङ जुइगु खनी ।

ठेकेदारलिसे सेट मिले यानातःगु दइगु खनि । जिउ हजुर, जिउ हजुर धाइगु तर, यायेबलय् पुलांगु पारां हे ज्या याइगु खनी ।’‘प्याकेजय् धइगु सेटिङ खनी । कर्मचारीयात दुरु जा नयेथें उखे नं वइगु, थुखें नं वइगु । ठकेदारं नं यक्व कायेदुुगुलिं यक्व बीगु जुल ।’

आः सिन्डिकेट त्वाःथलेगु जमाना वःगु धासें अध्यक्ष प्रचण्डं सिन्डिकेट त्वाः थलेमाःगु व त्वाः दलिगु विश्वास नं प्वंकादिल । वय्कलं सरकारी संयन्त्र दुने पलाः पतिकं बेथिति दुगु धासें थम्ह न्ववात धाःसा आपालं खँ स्यनीगु खँ कनादिसें अप्वः न्वमवाये धयादिल ।