बुंगद्यः निला लिपा जक सालीगु

यल (नेपालभाषा टाइम्स)- थुगुसी बुंगद्यः यलय् ताःई हे च्वनीगु जूगु दु । थौंकन्हय् यलया इति त्वालय् लानाच्वंगु बुंगद्यःया आः थनिं निला लिपा अर्थात् दिल्लागा द्वादसि (श्रावण १७ गते)
विहीवाः कुन्हु जक सालीगु जूगु दु ।

म्हिगः थनया मंगल बजारय् च्वंगु मन्दः दबुलिइ बुंगद्यः सालीगु साइत स्वयाः थ्व कुन्हु द्यः सालीगु न्हि क्वःछिउगु खः । थ्व ल्याखं यलया इति त्वालय् आः मेगु निला तक बुंगद्यःया रथ लानाच्वनीगु जूगु दु ।

बुंगद्यःया रथ वंगु वैशाख २९ गते निसें सालाः जात्रा न्यायेकूगु खः । तर रथ सालाच्वंगु इलय् हे रथ तसकं धेचुयाः स्यनी थें च्वंगुलिं रथ सालेगु ज्या दिकाः रथ निं दयेकूगु खः । थुगुसी बुंगद्यःया जात्रा ताःहाकः जुइ धकाः वंगु छुं ई न्ह्यवंनिसें हे चर्चा जुयाच्वंगु खः । खास यानाः पाञ्जुपिंसं थुगुसी द्यःयात भचा अप्वः रथय् तये माली धयाच्वंगु खँ नं चर्चाय् वःगु खः । बुंगद्यःया जात्रायात नेपाःया हे दकलय् ताःई तक न्ह्याइगु जात्रा धायेगु याः ।

इति त्वालं रथ सालाः जावलाख्यः थ्यंगुयां प्यन्हु लिपा भोटो क्यनीगु चलन दु । भोटो जात्रा क्वचाःकुन्हु हे द्यःयात खतय् तयाः क्वबियाः बुंगय् यंकी । द्यः बुंगय् थ्यंकाः नं प्यन्हु तक देगलय् मतसे पिने हे तया तइसा प्यन्हु कुन्हु प्यन्हु बिचाः धकाः यलय् च्वंपिं भक्तजन वनाः पुज्याइगु चलन दु ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु