ने. सं. ११४४ ञलाथ्व दशमी -

‘बागमति’ प्रदेशया आगंखँ, अन्ततः थुलि तक जूगु जुयाच्वन

येँ – प्रदेश ३ या नां बागमती व स्थायी राजधानी हेटौंडाय् तयेगु पार्टीया लाइन पारित याकेगु लागिं सत्तारुढ दल नेकपां थः सांसदतय्त अतिकं कडा रुपं हे ‘ह्वीप’ लगे याःगु खँ सीदुगु दु ।

नामाकरण व स्थायी राजधानी बारे पार्टीं काःगु निर्णययात न्ह्याथे यानाः नं लागू याकेगु लागिं पार्टीपाखें थः सांसदतय्त लिखित ह्वीप जारी याःगु खः । सांसदतय्त पार्टीया सचेतक रामेश्वर फुयाँलं पौ हे च्वयाः ह्वीप जारी यानादीगु खः । उकी वय्कलं प्रदेशया नां ‘बागमति’ तयेमाः धकाः कांग्रेसया सांसद इन्द्र बानियां तइगु प्रस्ताव व प्रदेशया राजधानी हेटौंडाय् तयेमाः धकाः मुख्यमन्त्री डोरमणि पौडेलं तइगु प्रस्तावया पक्षय् अनिवार्य रुपं मत बीमाः धकाः ह्वीप जारी यानागु खँ न्ह्यथनातःगु दु ।

बागमति नांया विरोध यानाच्वंपिं सांसदतय्सं थःपिंसं नेपालमण्डल व नेवाः-ताम्सालिङ प्रदेश नां तयेमाः धकाः दर्ता यानागु प्रस्तावय् छलफल जक जूसां याके बीमाः धकाः माग याःगु खःसा पार्टीपाखें अथे यायेगु सम्भावना मदु धकाः तप्यंक लिसः बियाहःगु खः ।

छम्ह सांसदं कनादी कथं पार्टीया संसदीय दलया बैठकय् प्रधानमन्त्री लिसें पार्टीया अध्यक्ष केपी ओलीं सांसदतय्त येँय् च्वनाः निर्देशन बियादीगु खँ थःगु मोबाइल हे हाण्ड्स् फ्रिलय् तयाः न्यंकूगु खः । पार्टी अध्यक्षं उकथं तप्यंक हे निर्देशन बियाहःगु न्यनाः आपालं सांसदत मौन जुइमाःगु खः ।

सांसदतय्सं नेपालमण्डल व नेवाः ताम्सालिङ नां तयेगु लागिं न्हापा दर्ता याना तयागु प्रस्तावय् सहलह जक जूसां याके बीमाः धकाः निरन्तर सः तःगु कारणं संसदीय बैठकं नं छवाः तक निर्णय याये मफयाः ताःहाकः जुयाच्वंगु खः । अन्तिमय् थ्व मुद्दायात कयाः दलया निर्णय माइन्युट याःबलय् उकी पार्टीया सांसदतय्सं न्हापा दर्ता यानातःगु ‘नेपालमण्डल’ व ‘नेवाः ताम्सालिङ’ प्रदेश नामाकरण सम्बन्धी प्रस्तावयात पार्टीया सम्पत्ति कथं स्वीकार यायेगु जुइ धकाः च्वयेगु ज्या जूगु खः ।

प्रदेशया नां सम्बन्धी प्रस्तावय् पार्टीया वरिष्ठ नेतातय्त माने यायेत गुलिं सांसदत येँय् हे वःगु खःसां उमित खाली ल्हाः लित छ्वःगु खँ धाःगु दु ।

प्रदेश ३ पुनर्संरचना याइ तिनि
प्रदेशया नामाकरण व स्थायी राजधानी बारे असन्तुष्ट सांसदतलिसे जूगु छगू खँल्हाबल्हाय् पार्टी अध्यक्ष पुष्पकमल दाहालं प्रदेश २ या सीमा हानं छकः पुनर्संरचना यायेगु तयारी जुयाच्वंगु जानकारी समेत बियादीगु खँ सीदुगु दु। प्रदेश ३ या वर्तमान सिमांकन पाय्छि मजू धइगु यक्व गुनासो वःगुलिं आः थ्व प्रदेशया छुं पहाडी जिल्ला प्रदेश ३ लय् लाकाः प्रदेश २ या गुलिखे तराई जिल्ला प्रदेश ३ य् तये हयेगु बारे खँ जुयाच्वंगु जानकारी वय्कलं बियादीगु खः । अथे जुल धाःसा हेटौंडा प्रदेशया पाय्छि दथुइ लाः वइगु व सकस्यां लागिं पायक जुइगु खँ नं वय्कलं कनादीगु खः । थथे जुल धाःसा हेटौंडाया बारे सुयां नं गुनासो मदइगु अनुमान जूगु खँ नं कनादीगु खः ।