छाया सेन्टरय् युएनया चिउताः
येँ (नेपालभाषा टाइम्स)÷ बहुविवादित छायादेवी कम्प्लेक्सया विषययात कयाः अभियान न्ह्याकाच्वंपिं अभियन्तातय्त कम्प्लेक्सलिसे स्वापू दुपिं थीथी मनूतय्सं ख्याच्वः बीगु ज्या यानाच्वंगु खँय् संयुक्त राष्ट्र संघया मानव अधिकार आयोगं थःगु सरोकार क्यंगु दु । राष्ट्र संघीय मानव अधिकार आयोगं म्हीग छगू प्रेस विज्ञप्ति सार्वजनिक यासें थःपिनि संस्कृति हनेगु मानव अधिकारया लागिं ल्वानाच्वंपिं अभियन्तातय्त ख्याच्वः बीगु ज्या तुरुन्त बन्द या धकाः नं अपिल यानातःगु दु ।
थ्व विषययात कयाः थःगु कथं अध्ययन यानाच्वंपिं राष्ट्र संघया विशेषज्ञतय्सं थ्व अपिल याःगु खः । वय्कःपिंसं खास यानाः छायादेवी कम्प्लेक्सया विषयय् कानुनी लडाइँ ल्वानाच्वंम्ह थँबहीया स्थानीय भागवत नर्सिंह प्रधानयात थीथी कथं वयाच्वंगु ख्याच्वःयात कयाः थ्व चिउताः प्वंकूगु खः ।
राष्ट्र संघीय विशेषज्ञतय् अपिलय् धयातःगु दु– थःगु संस्कृति हनेगु अधिकार सकसिकें दु, अले उकियात कयाः थःगु अभिव्यक्ति बीगु अधिकार नं सकसिकें दु । अभिव्यक्ति हे बिउगु आधारय् सुयातं ख्याच्वः बीगु पाय्छि मखु ।
अपिलय् धयातःकथं सन् ४५० निसें ७५० तकया दुने लिच्छवि जुजुपिंसं दयेकातःगु ऐतिहासिक पलेस्वां पुखूयात स्यंकाः पर्यटकीय भवन छायादेवी कम्प्लेक्स दयेकूगु खँय् गुथियार भागवत नर्सिंह प्रधानं विरोध याना वयाच्वंगु खः । थ्व प्रतिरोध याःगु कारणं वय्कःयात थीथी कथंया ख्याच्वः वयेगु लिसें छाया सेन्टरलिसे स्वापू दुपिं कर्मचारी युनियनया नेतातय्सं धुवांधू नापलानाः ख्याच्वःया भासं खँ तयेगु यानाच्वंगु दु । थुकिं यानाः प्रधानं असुरक्षित महसुस यानाच्वंगु दु ।
छाया सेन्टरय् अमेरिकी लगानी दुगु म्यारियट इन्टरनेशनलपाखें नं एलफ्ट काठमाडौं ठमेल होटल चायेकातःगु दुसा राष्ट्र संघं म्यारियट इन्टरनेशनललिसे नं स्वापू तयाः थ्व विवादपाखें तापाक च्वँ धकाः इनाप यायेधुंकूगु दु । म्यारियटयात व्यवसाय सम्बन्धी युएन गाइडलाइन पालना यायेत इनाप यासें थ्व विषयय् सर्वोच्च अदालतय् न्ह्यानाच्वंगु मुद्दाया फैसला मवःतले अन होटल चायेके मते धकाः नं इनाप याःगु खँ प्रेस विज्ञप्तिइ धयातःगु दु । म्यारियटं थुकियात कयाः थःपिनि लिसः धाःसा मबिउनिगु खँ नं उकी धयातःगु दु ।
अथे हे विज्ञप्तिइ नागरिकया मानव अधिकार रक्षा यायेत नेपाल सरकारयात नं इनाप यानातःगु दु । लिसें नेपाःया अदालतयात नं थ्व विषयय् न्ह्यानाच्वंगु वहसयात याकनं किनारा याना बीत आग्रह यानातःगु दु । राष्ट्र संघया थ्व विशेषज्ञ पुचलय् रोबर्ट म्याक कोर्कुडाल (प्रमुख), फर्नान्डा होपेनहाइम, पिचमोन येओफान्टोङ, डामिलोला ओलावुयी, एलिजावेथ कास्र्का आदिपिं दुथ्याः ।
लुमंकेबहः जू, छायादेवी कम्प्लेम्स विरुद्ध कानुनी लडाइँ ल्वानाच्वंम्ह स्थानीय भागवत नर्सिंह प्रधानं थःत ज्यान कायेगु धकाः हे ख्याच्वः वयाच्वंगु दु धकाः इलय् ब्यलय् कनेगु यानादीगु खः । सर्वोच्च
अदालतं छायादेवीया जग्गा गय् यानाः व्यक्तिया नामय् लाः वन धकाः रिपोर्ट तयार यायेत आदेश बीधुंकूगु दु ।
LEAVE YOUR COMMENTS