‘मतदान जूसा हेटौंडा राजधानी मजुइफु’
येँ- ३ नम्बर प्रदेशया राजधानी गन तयेगु धइगु बारे नेपाल कम्युनिष्ट पार्टी (नेकपां) ह्विप हे जारी याःसां हेटौंडाय् स्थायी राजधानी जुइगु सम्भावना धाःसा मदुगु खँ धाःगु दु । ३ नम्बर प्रदेशया सांसद विशाल खड्कां ‘नेपालभाषा टाइम्स’ लिसे खँ ल्हासें थ्व दावी यानादीगु खः ।
वय्कलं आः संसदय् प्रदेशया स्थायी राजधानी बारे सहलह न्ह्यानाच्वंगु व राजधानी ल्ययेगु निंतिं कार्यविधि तकं दयेके धुनागु खँ कँसें काभ्रे हे प्रदेश ३ या स्थायी राजधानी जुइ फइगु खँ कनादिल । पार्टीं ह्विप जारी याःसा छु जुइ ले धयागु न्ह्यसलय् वय्कलं संविधान स्वयां च्वय् पार्टी मखु धासें संविधानय् प्रदेशया राजधानी व नामाकरण यायेगु अधिकार प्रदेशसभायात बियातःगु खँ कनादिल ।
कार्यविधि कथं प्रस्तावित न्यागू थाय्या लागिं पालंपाः मतदान जुइ । राजधानी सम्भाव्यता अध्ययन समितिं प्रस्ताव याना हःगु थाय् लागिं मतदान जुइग खः ।
अध्ययन समितिं छसिकथं काभ्रे, ख्वप, चितवन, नुवाकोट व हेटौडाया नां स्थायी राजधानीया लागिं प्रस्ताव यानातःगु दु । उकी काभ्रे दकलय् न्ह्यःने दु । यदि कार्यविधि कथं मतदान यायेमाःगु अवस्था वल धाःसा दकलय् न्हापां काभ्रेया लागिं मतदान जुइ । यदि काभ्रेयात बहुमत मवल धाःसा जक मेगु थाय्या लागिं मतदान जुइ । काभ्रेया लागिं जूगु मतदानय् बहुमत वल धाःसा उकियात हे कायम यानाः वयां क्वय् लानाच्वंगु मेमेगु थाय्या लागिं मतदान जुइ मखु ।
हेटौंडाय् हे च्वंम्ह मुख्यमन्त्री डोरमणि पौडेल धाःसा अझ नं हेटौंडायात हे स्थायी राजधानी दयेकेमाः पार्टीया दुने लबिङ यानाच्वंगु खँ सीदुगु दु । वय्कलं जिउसा थुकी मतदान हे मयाकेत स्वयाच्वंगु खँ नं धाःगु दु ।
LEAVE YOUR COMMENTS