स्वनिगलय् थौं ४५ म्हेसिके संक्रमण, गंगालाल अस्पताल न्ह्यःनेया पसःथुवाःयात नं संक्रमण

येँ – स्वनिगलय् कोरोना संक्रमिततय् ल्याः हाकनं अप्वया वनेगु झ्वलय् थौं न्हिछिया दुने थप ४५ म्हेसिके संक्रमण पुष्टि जूगु दु । स्वास्थ्य मन्त्रालयया कथं थौं देय्न्यंकं यानाः २७४ म्हेसिके संक्रमण खनेदुगु खःसा थुकी मध्ये ४५ म्ह स्वनिगःया लाःगु खः । थौं स्वनिगलय् थप जूपिं मध्ये ४१ म्ह येँयापिं लाःगु खःसा ख्वप व यलया निम्ह निम्ह लाःगु खः । थुकिया लिसें येँय् संक्रमिततय् ल्याः ३९० म्ह थ्यंगु दुसा यलय् ९१ म्ह व ख्वपय् ५३ म्ह थ्यंगु दु । बुधवाः स्वनिगलय् १५ म्ह व मंगलवाः ५३ म्हेसिके संक्रमण खनेदुगु खः ।

थौं थप जूपिं यानाः नेपालय् संक्रमिततय् ल्याः १९५४७ म्ह थ्यंगु दु । थुपिं मध्ये सक्रिय संक्रमणय् ५ हजार २२७ म्ह मनूत लानाच्वंगु दनि । मेखे कोरोना संक्रमणं थौं हे जक थप स्वम्हेसिया ज्यान वंगु दु । थुकिया लिसें नेपालय् कोरोनां सीपिनि ल्याः ५३ म्ह थ्यंगु दु ।

गंगालाल अस्पताल न्ह्यःनेया पसःथुवाःयात नं संक्रमण
म्हिगः स्वनिगलय् कोरोना संक्रमण पुष्टि जूपिं झिंन्याम्ह मध्ये छम्ह येँया बाँसबारीस्थित गंगालाल अस्पताल न्ह्यःने नसाज्वलं पसः तयाच्वंम्ह जूगु खँ धाःगु दु । अस्पताल न्ह्यःने हे च्वंगु छेँय् नसापसः तयातःम्ह उम्ह मनूयात म्हिगः कोरोना संक्रमण जूगु पुष्टि जूगु खः । उम्ह मनू मानन्धर थरयाम्ह खः ।

छुं न्हि न्ह्यव गंगालाल अस्पतालय् हःपिं विरामीतय्के कोरोना संक्रमण खनेदयेवं अस्पताल दुने हे तःधंगु तनाव ब्वलंगु खः । थन छन्हुं हे न्हय्म्ह संक्रमितत थ्यंबलय् अस्पताल हे वासः याकाच्वंपिं गम्भीर विरामी बाहेक मेपिंत छेँय् लितछ्वया हःगु खः ।