हिन्दू राष्ट्र नेपालया माग यानाः भारतय् गतिविधि, नेपालय् गज्याःगु लिच्वः लायेफु ?

नेपालभाषा टाइम्स
११४४ थिंलाथ्व दशमी
- बुखँ
- राष्ट्रिय
किपा-भारतया रायपुरय् वंगु डिसेम्बर ११ य् हिन्दूराष्ट्« नेपाःया माग यानाः ज्ञापनपत्र ब्यूवनेगु झ्वलय् हिन्दूवादीत

थ्वहे डिसेम्बरया निगूगु वालय् भारतया छत्तीसगढ राज्यया रायपुरय् छगू चिकिचाधंगु पुचलं ‘हिन्दू राष्ट्र नेपाल समर्थन यात्रा’ नामं छगू ज्याझ्वः यात । जय श्रीराम सेना संगठन व आदित्यवाहिनी नांया निगू हिन्दूवादी संगठनतय्सं ‘समर्थन यात्रा’ यासें उकुन्हु हे राज्यया राज्यपालमार्फत भारतया राष्ट्रपतियात छगू ज्ञापनपत्र लःल्हात ।

थ्व ज्ञापनपत्रय् नेपाःया वर्तमान सरकारया नेतृत्व यानाच्वंगु नेकपा माओवादी केन्द्रया आलोचना यासें नेपाली नागरिकतय् चाहना कथं नेपाःयात हिन्दूराष्ट्र दयेकेत भारत सरकारं समर्थन यायेमाःगु माग यानातःगु दु । उकी नेपाः धर्मनिरपेक्ष जुइधुंकाः धर्मान्तरण अप्वःगु दावी यानातःगु दुसा चीनया हस्तक्षेप अप्वःगु व नेपाःया अस्तित्व रक्षाया निंतिं हिन्दूराष्ट्र व राजसंस्था आवश्यक दुगु खँ न्ह्यथनातःगु दु ।

डिसेम्बरया हे निगूगु वालय् भारतया अयोध्यास्थित जानकी महल ट्रस्ट धर्मशालाय् जूगु भारत वर्षीय व्राम्हण महासभाया राष्ट्रिय कार्यकारिणी बैठकया बन्द सत्रय् नं नेपाःयात हिन्दू राष्ट्र दयेकेमाःगु प्रस्ताव वःगु खँ उगु बैठकय् सहभागी छम्ह नेपाःमिं धाःगु दु । तर बेठकं नेपाः सम्बन्धी उगु प्रस्ताव पारित मयाःगु व निर्णयय् नं छुं न्ह्यमथंगु दावी नं उगु बैठकय् सहभागी पशुपति क्षेत्र विकास कोषया पुलांम्ह सञ्चालक अर्जुनप्रसाद बास्तोलां याःगु दु । वया कथं निदँ न्ह्यः हे संस्थाया नेपालय् च्वंगु बैठकं थ्व विषय पारित यायेधुंकूगु थ्व प्रस्तावयात हाकनं तयाच्वनेम्वाः धकाः पारित मयाःगु खः । वास्तोलाया उगु संस्थाया विद्वत परिषद्य् दुथ्याःम्ह खः । उकिं हे उगु बैठकय् ब्वति कायेत वंगु खः । वास्तोलाया कथं निदँ न्ह्यः उगु संस्थाया नेपालय् जूगु सम्मेलनय्हे नेपाःयात हिन्दू राष्ट्र दयेकेत माग यायेगु धकाः निर्णय याःगु खः ।

गतिविधि भारतय्, माग नेपाःलिसे सम्बन्धित
नेपालय् थीथी पुचलं हिन्दूराष्ट्र व राजसंस्था पुनस्र्थापनाया माग याइगु इलय् भारतय् नं हिन्दूवादी संस्थातय्सं उकिया समर्थनय् चिचिधंगु कार्यक्रम याइगु उदाहरण यक्व हे दु । लिपांगु छुं दँ न्ह्यवनिसें नेपालय् हिन्दूराष्ट्र व राजसंस्थाया पुनस्र्थापना यायेमाःगु माग यानाः भारतय् विशेष यानाः हिन्दूवादी धार्मिक संगठनतय्सं चिचिधंगु ज्याझ्वः यानाः ज्ञापनपत्र लःल्हायेगु याना वयाच्वंगु दु । नेपालय् हिन्दूराष्ट्र व राजसंस्था पुनस्र्थापनाया माग याइपिं पुचलं भारतय् जुइगु थज्याःगु समर्थन ज्याझ्वःयात नागरिक तहलं सद्भावपूर्ण समर्थन याःगु धया वयाच्वंगु दुसा गणतन्त्रवादीतय्सं आन्तरिक मामिलाय् बाह्य हस्तक्षेप जुयाच्वंगु धासें अज्याःगु गतिविधि दिकेमाः धया वयाच्वंगु दु ।

अथेहे गुलिखेसिनं नेपाःया तराइ क्षेत्रय् जुयाच्वंगु साम्प्रदायिक सद्भाव स्यंकीगु कथंया गतिवधियात नं भारतय् जुयाच्वंगु गतिविधिलिसे स्वानाः स्वयावयाच्वंगु दु । भारतय् सक्रिय नेपाःयात हिन्दू राष्ट्र दयेकेमाः धाइगु संगठनत छु न छुं कथं नेपाःया हिन्दूवादी संस्थातलिसे स्वापू दुपिं जूगुलिं नं थज्याःगु शंका जुइगु स्वाभाविक हे जूगु यक्वसिया विश्लेषण दु ।

गुलिखे विश्लेषकतय्सं भारतया सत्तारुढ हिन्दूवादी दल भारतीय जनतापार्टीलिसे छुं नं छुं कथं स्वापू दुगु हिन्दूवादी संघसंस्थातय्सं हे नेपालय् हिन्दूराष्ट्र पुनस्र्थापनाया माग न्ह्याका वयाच्वंगु धया वयाच्वंगु दु । थज्याःगु गुलिखे गतिविधिइ भाजपायामौन समर्थन दुगु उमिगु विश्लेषण दु । तर भारतय् हिन्दूराष्ट्र नेपाःया माग यानाः ज्याझ्वः यानाच्वंपिंसं धाःसा थःपिंत भाजपाया समर्थन मदुगु व स्वतस्फूर्त रुपं जःलाखःला देय्या नागरिकतय् माग कथं थःपिंसं थःपिनि सरकारया ध्यानाकर्षण यानाच्वनागु धया वयाच्वंगु दु ।

रायपुरय् हिन्दूराष्ट्र नेपाल समर्थन यात्राया ग्वसाःग्वःगु जय श्रीराम सेना सगठन रायपुरया अध्यक्ष गौरव सोलंकीं धाइ, ‘नेपाःया मामिलाय् भारत सरकारं निर्णय यायेगु खः । जिमिसं मखु । जिमिसं जनताया रुपय् माग तयेगु दइगु ला भारतीय संविधानं हे अधिकार बियातःगु दु । जिमिसं नेपाली जनताया भावना कथं थः सरकारयात नेपाः हिन्दू राष्ट्र जुइमाः व उकियात भारतं समर्थन यायेमाः धकाः माग तयागु खः । थुकी थनया सरकार वासत्ताधारी दल सुयां संलग्नता मदु ।’

उमिसं थःपिनिगु ज्याझ्वः याःगु इलय् ओडिसाया पुरीइ च्वंगु गोबद्र्धन मठया शंकराचार्य स्वामी न्शिचलानन्द सरस्वतीया तस्बिर नं छ्यःगु दु । निश्चलानन्द सरस्वती व हे शंकराचार्य खः गुम्हेसिनं नेपाःयात हिन्दू राष्ट्र जूगु घोषणा याःगु खः । अले व थगुने शिवरात्रीबलय् नेपाः नं वःगु खः । सोलंकिं व हे शंकराचार्ययात न्ह्यथँसें वयागु हे आर्शिवादं नेपालय् हिन्दूराष्ट्रया समर्थनय् ज्याझ्वः यानागु खँ कंगु दु ।

नेपालं गणतन्त्रात्मक शासन व्यवस्था व धर्मनिरपेक्षता सहितया संविधान जारी यासां निसें हे भारतय् नेपाःयात हिन्दू राष्ट्र दयेकेमाः धकाः थीथी गतिविधि जुया वयाच्वंगु दु । सन्२०१४ य् भाजपा सत्ताय् वसां निसें थज्याःगु गतिविधि जुया वयाच्वंगु खःसा थुकिया प्रभाव नेपाःया तराई लागाय् तसकं न्यना वनाच्वंगु दु ।

नेपालय् हिन्दूराष्ट्र व राजतन्त्र पुनस्र्थापनाया वकालयत याना वयाच्वंम्ह योगी आदित्यनाथ थौंकन्हय् नेपाःलिसे सीमा स्वाःगु उत्तर प्रदेशया मुख्यमन्त्री जुयाच्वंगु दु । वं ज्ञानेन्द्र शाह लखनउ वंबलय् जुजु कथं हे लसकुस याःगु खः ।

छुं ई न्ह्यवनिसें नेपाःया थीथी थासय् हिन्दूराष्ट्रया माग याना वयाच्वंपिं व धर्मनिरपेक्षया पक्षधरपिं दथुइ विवाद व झडप खने दया वयाच्वंगु दु । थज्याःगु गतिविधि तच्वयेकेगु निंतिं नेपाःया हिन्दूवादी संगठनतय्त छ्यलेगु ज्या भारतया थज्याःगु हे संस्थाया छुं न छुं कथं भूमिका दुगु आशंका याना वयाच्वंगु दु । थुकियात पुष्टि यायेगु आधार मदुसां मधेश प्रदेशय् च्वना वयाच्वंम्ह राजनीतिशास्त्रया प्राध्यापक हरेराम ठाकुरं धाइ, ‘नेपालय् आरएसएसया मेगु रुप प्राज्ञिक परिषद् खः । थन जुइगु गतिविधिइ उखे (भारत)या छु नं छुं कथं संलग्नता दया हे च्वंगु दु । थ्व धयागु तप्यंक ल्हाः मतःसां चाःहिकाः न्हासय् थिउवःगु हे खः ।’ वय्कलं नेपालय् गतिविधि याना वयाच्वंपिं हिन्दूवादी संघसंस्थातय् छु नं छु कथंया स्वापू भारतया अज्याःगु संस्थालिसे दुगुलिं नं थुकिं प्रभाव लानाच्वंगु खँ धयादी ।

नेपालय् गज्याःगु प्रभाव लाइ ?
प्राध्यापक ठाकुरया कथं भारतय् जुयाच्वंगु गतिविधि व नेपालय् विस्तारित जुया वनाच्वंगु गतिविधि स्वयेबलय् दलतय्सं राजतन्त्रया पक्षय् मखुसां हिन्दू राष्ट्र बारे पुनर्बिचार याइगु अवस्था वयेफु ।

‘जिं तःधंगु दलया तःधंपिं नेतातय् लिपांगु भाषण न्यना वयाच्वनागु दु । उमिसं गणतन्त्र व संघीयताया पक्षय् गुलि प्रखर रुपं न्ववानाच्वंगु दु, उलि धर्मनिरपेक्षताया बारे न्ववानाच्वंगु मदु । उकिं पक्का हे छुं संकेत यानाच्वंगु दु’ वय्कलं धयादीगु दु । वय्कःया कथं बहुसंख्या हिन्दूत दुगु नेपालय् चुनावय् मत बीपिं नं अप्वः उपिं हे दुगुलिं नेतातय्सं हिन्दूराष्ट्र मागयात कयाः बांलाक विरोध याये मफयाच्वंगु खः । भारतीय संस्थापन पक्षं आःया तःधंगु दलतय्त समर्थन याःसां उमिसं चाःहिकाः नेपालय् नं हिन्दूराष्ट्रया मागयात मलजल बीत भूमिका म्हिताच्वंगु आशंका वय्कःया दु । वय्कलं धयादी, ‘नेपालय् जुइगु गतिविधिइ भारत जुइमा वा चीन जुइमाः जःलाखःलाया प्रभाव ला लानाच्वंगु हे दइ । उकिं आः भारतय् जुयाच्वंगु गतिविधि व नेपालय् ल्ह्वनाच्वंगु माग दथुइ छुं न छुं स्वापू दु धयागु जितः ताः ।’

बिबिसी नेपाली अनलाइन