अमेरिकाय् नेपालभाषा काव्य बारे चर्चा जुइगु

येँ – अमेरिकाय् नेपालभाषा काव्य बारे चर्चा व कविता वाचन ज्याझ्वः याइगु जूगु दु । नेपालभाषा परिषद्या न्वकु लिसें कवि नविन चित्रकारं अमेरिकाया मिनेसोटास्थित अनोका–रामसे कम्युनिटी कलेजया अंग्रेजी विभागं याइगु अन्तक्र्रियाय् नेपालभाषा काव्य बारे चर्चा यानादीत्यंगु खः ।

भाजु चित्रकार वंगु शुक्रवाः अमेरिका झाःगु खःसा वय्कःयात विभागया प्रमुख क्याथरिन कैसरं प्रवचनया लागिं सःतादीगु खः । ज्याझ्वलय् थम्हं नेपालभाषा काव्यया म्हसीका बिसें समसामयिक कविपिनि अंग्रेजीं अनुदित कविता पाठ यायेगु खँ भाजु चित्रकारं ‘नेपालभाषा टाइम्स’ यात कनादिल ।

थःगु निलात्या ताःहाकःगु अमेरिका भ्रमणया इलय् नेपालभाषा साहित्ययात कयाः मेमेगु नं आपालं ज्याझ्वः यायेगु ग्वसाः जुयाच्वंगु जानकारी नं वय्कलं बियादिल ।