च्वमि कमल तुलाधर मंत

येँ (नेपालभाषा टाइम्स)- नेपालभाषाया च्वमि लिसें अंग्रेजी भाय्या पत्रकार कमल तुलाधर शनिवाः आकाझाकां मंत । ६७ दँ दुम्ह वय्कः लालदरवारया थःगु हे छेँय् द्यनाच्वँच्वं मदुगु खः । म्हीग हे थनया कर्णदिपय् वय्कःया अन्तिम संस्कार क्वचाःगु दु ।

वय्कलं नेवाः भाय् स्यनीगु लोकंह्वाःगु सफू ‘ज्वजलपा’ च्वयादीगु खः । लिसें वय्कलं नेवाः भाय्–अंग्रेजी खँग्वःधुकू नं निर्माण यानादीगु दु । अथे हे वय्कलं महाकवि सिद्धिदास महाजुया ‘शिवविलास’ काव्य व चित्तधर हृदयया ‘मिं मनः पौ’ अंग्रेजी भासं अनुवाद यानादीगु खः । वय्कलं ल्हासाया नेवाःतय् सम्बन्धी सफू ‘क्याराभान टु ल्हासा’ नं च्वयादीगु दु । लिसें वय्कलं ल्हासा नेवाःतय् बारे आपालं फुटकर च्वसुत नं च्वयादीगु दु ।

वय्कःया भाय् स्यनीगु सफू ‘ज्वजलपा’ आः तक झिगू स्वयां अप्वः संस्करण पिहां वयेधुंकूगु दु । वय्कः काठमाडौं पोष्ट न्हिपौया उपसम्पादक व द राइजिङ नेपाल न्हिपौया पुलांम्ह उपसम्पादक नं खः । वय्कः नेपालभाषाया शिक्षा अभियन्ता दिपक तुलाधरया माइलाम्ह दाजु खः । वय्कःया जहान लिसें निम्ह म्ह्याय् दी ।