नेपाल राष्ट्रिय खड्गी समाजया निक्वःगु राष्ट्रिय अधिवेशन

येँ – नेपाल राष्ट्रिय खड्गी समाजया निक्वःगु राष्ट्रिय अधिवेशन आः नकतिनि जुल । अधिवेशनया उलेज्या यासें वाङ्मय शताब्दी पुरुष वरिष्ठ संस्कृतिविद् डा. सत्यमोहन जोशीं स्वनिगःया आदिवासी नेवाः समुदाय आदिकालंनिसें समावेशी खः धयादिल । स्वनिगःया सांस्कृतिक गतिविधिइ नेवाः समुदाय दुनेया जातजातिया महत्वपूर्ण भूमिका दु धासें नेवाः समाजय् गबलें नं जातीय भेदभावया अवस्था मदुगु नं दावी यानादिल ।नेपालय् नेवाःया म्हसीका न्ह्यब्वयेगुलिइ खड्गी समुदायया योगदानयात कयाः च्वछायादिसें संस्कृतिविद् जोशीं धयादिल, ‘देय्या थीथी नखःचखः हनेगुनिसें कयाः मनू सित धाःसा सिथं यकेगु इलय नाय्खिं बाजं थानाः मनूया अन्तिम यात्राय् तकं साथ बीपिं धइपिं हे खड्गी समुदाय जूगुलिं थ्व जाति नेपाःया तजिलजिया छगू पर्याय हे खः ।’ज्याझ्वःया विशेष पाहां येँ महानगरपालिकाया उपप्रमुख हरिप्रभा खड्गीं देय् व राष्ट्रया निंतिं पूर्णरुपं समर्पित जुयाः न्ह्याः वनेत समाजया पदाधिकारीपिंत इनाप यानादिल ।

हरेक जातजातिं थःथःगु हे बिस्कं तजिलजि, परम्परा व मान्यतायात ल्यंका तयेमाः धासें उकिया निंतिं येँ मनपा नं पूर्णरुपं ग्वाहालि यायेत प्रतिवद्ध दुगु वय्कलं धयादिल ।अधिवेशनया उद्घाटन सत्रय् थीथी ख्यलय् योगदान बियादीपिं खड्गी समाजया च्याम्ह विशिष्ट व्यक्तित्वयात नं हनेज्या याःगु खः । ज्याझ्वलय् वातावरणीय विज्ञान विषयय् न्हाप जुयाः नेपाल विद्याभूषण ‘ख’ कयादीत ताःलाःम्ह आरती खड्गी, नेपाःया दुर्गम हिमाली भेगय् मस्तय्त शिक्षा बीगु ज्याय् योगदान याना वयाच्वनादीम्ह विनोद शाही, विश्व शारीरिक सुगठनय् थीथी पदक त्याकादीत सफल राजेश शाहीयात हंगु खः ।अथे हे नेपाल यातायात व्यवसायी महासंघया न्याक्वःगु महाधिवेशनं केन्द्रीय उपाध्यक्षय् निर्वाचित ऐनकुमार शाही, महासंघया हे ३ नं. प्रदेशया उपप्रमुखय् निर्वाचित जुयादीम्ह त्रिरत्न नेवाः, राजीव गान्धी युनिभर्सिटी अफ हेल्थ साइन्स कर्नाटका बैंगलोरं फिजियोथेरापीइ स्नातक व स्नातकोत्तर तहय् निगू स्वर्ण पदक त्याकादीम्ह रीमा शाही व चार्टर्ड अकाउन्टेन्ट डिग्री प्राप्त यायेत ताःलाःम्ह श्वेता शाहीयात नं हनेज्या याःगु खः ।

सम्मानित जुयादीपिं वय्कःपिंत मूपाहां जोशीं हनापौ लःल्हानादीगु खःसा समाजया नायः मानबहादुर खड्गीं दोसल्लां न्ययेकादीगु खः ।अधिवेशनं समाजया न्हूगु ज्यासना पुचःया नं ल्यज्या याःगु खः । मानबहादुर खड्गीया हे अध्यक्षताय् पीछम्हेसिया न्हूगु ज्यासना पुचःया ल्यज्या याःगु खः । ज्याझ्वलय् प्रतिनिधिसभा सदस्य जीवनराम श्रेष्ठ, ३ नं. प्रदेशसभा सदस्य राजेश शाक्य लगायत आपालं जातीय संघसंस्थाया प्रतिनिधिया उपस्थिति दुगु खः । अधिवेशनया उलेज्या स्वयां न्ह्यः थीथी सांस्कृतिक बाजलिसें छगू ¥याली नं पिथंगु खः ।