पञ्चवीर सिंह सिरपाः लःल्हात
नेपालभाषा टाइम्स न्हिपती पिहां वइगु बुद्ध धर्म सम्बन्धी बांलाःगु च्वसुयात दँय्दसं बीगु याना वयाच्वंगु पञ्चवीर सिंह सिरपाः थुगुसी वंगु शनिवाः लःल्हात । बु.सं. २५६०या उत्कृष्ट मिसा च्वमि ललिता ध्वाख्वाः व मिजं च्वमि माधवलाल प्रधानयात उगु सिरपाः लःल्हाःगु खः ।
स्वयम्भूस्थित आनन्दकुटी विद्यापीठया हलय् जूगु उगु ज्याझ्वलय् मूपाहां नेपालभाषा मिसा खलःया नायः मंगला कारंजितं हनापौ लःल्हानादीगु खःसा दाता पञ्चवीर सिंह तुलाधरं सिरपाःया दां लःल्हानादीगु खः । थुगु सिरपाःया दां १११११÷– तका खः ।
युवा बौद्ध समूहया ग्वसालय् समूहया नायः तेजनारायण मानन्धरया सभापतित्वय् जूगु उगु ज्याझ्वलय् सिरपाःया दाता पञ्चवीर सिंह तुलाधरं स्वक्वः तक पञ्चवीर सिरपाः त्याकादीम्ह च्वमि सुनिता मानन्धरयात नं विशेष सिरपाः कथं हनापौ व झिद्वः दां लःल्हानादीगु खः । अथे हे न्हूगु नीस्वनादीगु ‘इलोहं पञ्चवीर परियत्ति सिरपाः’ यलया शाक्यसिंह विहारयात लःल्हानादीगु खः ।
सिरपाःया निर्णायक मण्डलय् अनागारिका वीर्यवति, डा. केशवमान शाक्य, सह प्राध्यापक मदनरत्न मानन्धर च्वनादीगु खः ।
ज्याझ्वलय् निर्णायक मण्डलया दुजःपिं शाक्य व मानन्धरलिसें नेपालभाषा टाइम्सया सम्पादक सुरेश मानन्धर, इलोहं प्रकाशनया प्रबन्ध निर्देशक नरेशवीर शाक्य युवा बौद्ध समूहया अनिल स्थापितपिंसं थःथःगु नुगः खँ प्वंकादीगु खः ।
LEAVE YOUR COMMENTS