ङत तुलाधर मिसा पुचःया हिदान ज्याझ्वः

येँ- ङत तुलाधर मिसा पुचःया ग्वसालय् छगू हिदान ज्याझ्वः जुल । नेपालभाषाया न्हापांम्ह मिसा बाखं च्वमि साहित्यकार मोतिलक्ष्मी उपासिकाया ११२ क्वःगु बुन्हिया लसताय् लाकाः पुचःपाखें उगु हिदान ज्याझ्वः याःगु खः ।

ङत अजिमाया दबुलिइ लायन्स क्लब अफ काठमाडौंया ग्वाहालिइ जूगु हिदान ज्याझ्वःया उलेज्या ङत तुलाधर त्यंघः त्वाः कवःया थाकुलि जितरत्न तुलाधरं त्वाःदेवाय् मत च्याकाः यानादीगु खः । साहित्यकार मोतिलक्ष्मीया किपाय् स्वां व खादा क्वखायेकाः शुरु जूगु हिदान ज्याझ्वलय् मुक्कं स्वीच्याम्हेसिनं हिदान यानादीगु खः ।

हिदान यानादीपिंत समिति, मिसा पुचःया नायःलिसें पदाधिकारीपिंसं दसिपौ इनादीगु खःसा नायः मिनु तुलाधरं ग्वाहालि याःगु लायन्स क्लब अफ काठमाडौं ब्लड सर्कलया दुजःपिंत खादा क्वखायेकाः लसकुस यासें मतिनाया चिं नं लःल्हानादीगु खः ।