ने. सं. ११४४ कौलाथ्व पारू - नःलास्वनेगु

मधेश प्रदेशय् नेवाः भाय्, प्याखं व धिमेया प्रशिक्षण

येँ (नेपालभाषा टाइम्स)- मधेश प्रदेशया रौतहतय् नेवाः भया्े, नेवाः प्याखं व धिमे बाजंया प्रशिक्षण जूगु दु । रौतहतया चन्द्रपुरय् लछियंकं न्ह्याःगु प्रशिक्षण वंगु बुधवाः क्वचायेकूगु खः । प्रशिक्षण रौतहत जिल्ला समितिया ग्वसालय् व मधेश प्रदेश समितिया ग्वाहालिं जूगु खः ।

समापन समारोहय् न्ववासें चन्द्रपुर नगरपालिकाया प्रमुख संजय काफ्लें न्हूपुस्तायात थःपिनिगु कला, संस्कृति स्यनेबलय् संस्कृति संरक्षणय् तःधंगु ग्वाहालि जुइगु विश्वास प्वंकादिल । थ्व झ्वलय् वय्कलं नेवाः समुदायं थःपिनि कला, संस्कृति संरक्षणय् याना वयाच्वंगु न्ह्यथनेबहःगु ज्याया प्रसंशा नं यानादिल ।

वय्कलं चन्द्रपुर नगरपालिकाय् फुक्कं जात, धर्म, संस्कृतिया सुरक्षा व प्रवद्र्धन यायेगु जुइ धासें चन्द्रपुर नगरयात सांस्कृतिक नगर दयेकेगु निंतिं नगरपालिकां ज्या याना वयाच्वंगु खँ कनादिल ।

ज्याझ्वलय् न्ववानादिसें नेवाः देय् दबू रौतहटया अध्यक्ष बालकृष्ण श्रेष्ठं नेवाः समुदाय कला संसकृति तसधं धनी जूगु खँ न्ह्यथँसें न्हूगु पुस्तां मौलिक संस्कृति, भाषा, परम्परा ल्वःमंका वनाच्वंगुलिं उमित थुखेपाखे आकर्षित यायेत थ्व प्रशिक्षण ज्याझ्वः तयागु खँ कनादिल ।

अथेहे नेवाः देय् दबू मधेश प्रदेशया अध्यक्ष तिलकलाल श्रेष्ठं समग्र मधेश प्रदेशय् नेवाः समुदाय संगठीत जुयाःथःगु कला, भाषा, संस्कृति व परम्परा ल्यंकातय्त न्ह्याः वनाच्वंगु खँ कनादिल । नेवाः ल्याय्म्ह दबूया अध्यक्ष सुदनमान मुनिकारं रौतहतया ल्याय्म्ह पुस्तायात नेवाः भाय्, प्याखं व धिमे बाजंया प्रशिक्षण बिउगु खः ।