स्वयम्भूया गजुलिइ प्राण प्रतिष्ठा

येँ (नेपालभाषा टाइम्स)- स्वयम्भू महाचैत्यय् वाफय् वयाः पुइका यंकूगु गजू छुनाः म्हिगः प्राण प्रतिष्ठा यायेगु ज्या जुल । राष्ट्रपति रामचन्द्र पौडेलं उगु मू गजूया प्राण प्रतिष्ठा यानादीगु खः । स्वयम्भू व्यवस्थापन तथा संरक्षण महासमितिया ग्वसालय् जूगु छगू धार्मिक ज्याझ्वःया दथुइ प्राण प्रतिष्ठा जूगु खः ।

वंगु २०७९ फागुन ३० गते वाफय् वयाः चैत्यय् क्षति जूगु खः । लिपा ५० लाख तका खर्च यानाः जीर्णोद्धार याःगु खः । पुरातत्व विभाग, येँ मनपा, जिल्ला प्रशासन कार्यालय व गुथि संस्थानया प्राविधिक पुचलं विस्तृत अध्ययन यायेधुंकाः जीर्णोद्धार ज्या न्ह्याकूगु खः ।

म्हिगः जूगु ज्याझ्वलय् भिक्षु धर्ममूर्ति महास्थविरं स्वयम्भू क्षेत्रय् जुयाच्वंगु थीथी ज्याबारे कनाबिज्याःगु खःसा राष्ट्रपति पौडेलं थीथी व्यक्तिपिंत हनापौ लःल्हानादीगु खः ।