ने. सं. ११४६ बछलागा एकादशी - अपरा एकादशी, चित्तधर हृदय या १२०क्वःगु बुदिं

‘इतिहासय् येँदेय् बर्लिन–पेरिस ज्वःगु शहर खः’

येँ -‘१६ औं शताब्दीया अन्त्य व १७ औं शताब्दीया शुरुपाखे येँ देय् धइगु युरोपया बर्लिन व पेरिस ज्वः जुइक विकास जुयाच्वंगु नगर खः । तर थौं थ्व थाय्या अवस्था छाय् थथे जुल ?’स्थानीय विकास मन्त्री हृदयेष त्रिपाठीं तयादीगु न्ह्यसः खः थ्व । म्हिगः थनया बसन्तपुली जूगु २५ क्वःगु महानगर दिवसया ज्याझ्वलय् मूपाहांया थासं न्ववासें मन्त्री त्रिपाठीं थ्व खँ धयादीगु खः । वय्कलं येँ महानगरपालिकां देय्या राजधानी जूगुया दायित्व जक मखु थ्व नगरयाके दुगु संस्कृति व सभ्यताया विरासत क्वबीमाःगु दायित्व नं दु धासें थुकिया संरक्षण याना वनेमाःगु खँय् बः बियादिल ।

ज्याझ्वःया सभापति लिसें येँ मनपाया मेयर विद्या–सुन्दर शाक्यं थौंकन्हय् मेलम्ची योजनां यानाः येँय् तसकं धू ब्वयाच्वंगु खँ कँसें थःपिनि कार्यकाल दुने हे मेलम्चीं ज्या क्वचायेकूसा सतक दयेकेगु ज्या थःपिंसं याना बी धयादिल । लिसें वय्कलं नगर दुने पा¨कङ भवन दयेका वनेगु ग्वसाः दु धासें सुनां नं पा¨कङ भवन दयेकल धाःसा नक्सा पास दस्तुर छुट बीगु घोषणा यानादिल ।

नगरपालिका फोरमया सचिव लिसें थिमि नगर–पालिकाया मेयर मदनसुन्दर श्रेष्ठं थौंकन्हय् उपत्यका विकास प्राधिकरण स्थानीय सरकारया समानान्तर थें न्ह्यानाच्वंगु जुयाः थ्व निकाय खारेज यायेमाःगु माग यानादिल ।

शहरी विकास राज्यमन्त्री रामवीर मानन्धरं देशय् दुई तिहाइ बहुमतया सरकार दुगु वर्तमान इलय् हे यदि माक्व विकास जुइ मफुत धाःसा लिपा थ्व ज्या यायेत अझ थाकुइगु बिचाः प्वंकादिल ।

येँ मनपाया उपमेयर हरिप्रभा खड्गी श्रेष्ठं लसकुस यासें न्ह्याःगु उगु ज्याझ्वलय् प्रतिनिधिसभाया सांसद जीवनराम श्रेष्ठ, प्रदेश सांसद नारायण सिलवालपिंसं नं भिंतुना न्वचु बियादीगु खः ।

उगु हे ज्याझ्वलय् मेयर शाक्यं येँ देय्यात आः सडक मानव मुक्त शहर दयेकेगु घोषणा नं यानादिल । येँ महानगरपालिकां थौंकन्हय् मानवसेवा आश्रमलिसे जानाः थ्व ज्या न्ह्याकाच्वंगु दु ।

ज्याझ्वलय् किलाघः कुमारी व मखं कुमारीयात दँय् १५,००० तका भत्ता बीगु घोषणा लिसें सम्मान याःगु खः । अथे हे ज्यापु समुदाय, नायः समुदायया बाजं गुरुपिं लिसें गुंला बाजं, पँय्ताः व यँयाःबलय् जक पिहां वइगु लाखे, सवःद्यः, पुलुकिसि व दीप्याखंया बाजं गुरुजुपिंत नं दां सहित हनेगु ज्या जूगु खः । अथे हे थीथी सञ्चार माध्यमया झिम्ह पत्रकार, मनपाया दीर्घसेवी कर्मचारी, मनपा दिवसया लसताय् जूगु थीथी कासाय् त्याःपिंत नं सिरपाः लःल्हायेगु ज्या जूगु दु । ज्याझ्वलय् सांस्कृतिक ज्याझ्वः व नेवाः नसा नखः नं जूगु खः ।

अन्तर्राष्ट्रिय मेयर सम्मेलन याइगु
येँ- राजधानी येँ देशय् आः याकनं हे अन्तर्राष्ट्रिय मेयर सम्मेलन यायेगु तयारी शुरु जूगु दु । थ्वहे वइगु सन् २०२० तकया दुने येँय् विश्वया थीथी देय्या थीथी शहरय् च्वंपिं मेयरतय्त सःताः अन्तर्राष्ट्रिय सम्मेलन यायेगु तयारी जूगु खः । स्वनिगःया नगरपालिका फोरमया सचिव लिसें थिमि नगरपालिकाया मेयर मदनसुन्दर श्रेष्ठं म्हिगः महानगर दिवसया ज्याझ्वलय् न्ववासें थुकिया जानकारी बियादीगु खः ।