कर्मचारीयात ज्या याकेत कार्यसम्पादन सम्झौता
येँ – नेपाल विद्युत प्राधिकरणं मत चुहावट नियन्त्रण यायेत व सेवा प्रवाह सुधार यायेत थःगु ज्याकूया कर्मचारीतलिसे कार्यसम्पादन सम्झौता याःगु दु । देन्यंकंया थीथी क्षेत्रीय कार्यालय, जिल्ला कार्यालय व वितरण केन्द्रया प्रमुखत लिसे थथे कार्यसम्पादन सम्झौता याःगु खः ।
थ्वहे झ्वलय् शनिवाः वितरण तथा सेवा निर्देशनालय अन्तर्गतया हेटांैडा क्षेत्रीय कार्यालय अन्तर्गतया शाखा प्रमुख नवराज सुवेदनीलिसे प्राधिकरणया कार्यकारी निर्देशक कुलमान घिसिङं कार्य सम्पादन सम्झौता यानादिल ।
अथेहे ऊर्जा जलस्रोत तथा सिँचाइमन्त्री वर्षमान पुन, सचिव सञ्जय शर्मा, प्राधिकरणया संचालक समितिया दुजः विश्वप्रताप गौतमया उपस्थितिइ निर्देशनालयया उपकार्यकारी निर्देशक हरराज न्यौपानेलिसे क्षेत्रीय कायाृलय अन्तर्गतया झिगू शाखा प्रमुखलिसे नं थज्याःगु हे सम्झौता याःगु दु ।
थ्वयां न्ह्यव जनकपुर, नेपालगञ्ज व सुर्खेत क्षेत्रीय कार्यालयया प्रमुख, उगु ज्याकू अन्तर्गतया वितरण केन्द्र प्रमुखपिंलिसे नं थज्याःगु सम्झौता यायेधुंकूगु दु ।कार्यसम्पादन सम्झौताय् विद्युत चुहावत नियन्त्रणयात उच्च प्राथमिकता तयातःगु दु । सम्झौताय् दुथ्याकातःगु सुचकतय्त मूल्यांकन यानाः ज्या याःगु कथं शाखा प्रमुखतय्त पुरस्कार व दण्ड बीगु खँ सम्झौताय् उल्लेख जुयाच्वंगु दु ।
कार्यसम्पादन सम्झौता मार्गनिर्देशक निर्देशिका जूगुलिं ग्राहकतय्त बीगु सेवाय् सुधार व ज्याकू दुने जुइगु ज्याय् चुस्तता वयाः समग्रं रुपं संस्थाया प्रशासनिक व वित्तीय अवस्थाय् सकारात्मक प्रभाव लाइगु प्राधिकरणं आशा यानातःगु दु ।
ऊर्जा मन्त्री पुनं सेवाप्रवाह यायेगु शैलीयात सुधार यानाः प्राधिकरणयात प्रतिस्पर्धी, सक्षम व सवल दयेकेगु निंतिं थज्याःगु सम्झौता यानागु खँ कनादिल । विद्युत चुहावत जुयाच्वंगुलिं प्राधिकरणया आम्दानी यक्व हे म्हो जुयाच्वंगु धासें मन्त्री पुनं चोरी नियन्त्रणया निंतिं प्रभावकारी पलाः न्ह्याकेत व प्राविधिक चुहावट नियन्त्रणया निंतिं प्रणालीइ सुदृढीकरणया निंतिं इनाप नं यानादीगु दु ।
कार्यकारी निर्देशक घिसिङं पारदर्शी, नैतिकवान, व्यावसायिक व ज्याकुथिइ चेन अफ कमाण्ड कायम यासें निर्धक्क व निडर जुयाः ज्या यायेत शाखा प्रमुखतय्त निर्देशन नं बियादीगु दु । मत खुया काइगुयात नियन्त्रणया निंतिं अभियान न्ह्याकेत, प्रणाली सुदृढीकरण यायेत, बक्यौता असुली यायेत कडाइ यायेमाःगु खँ वय्कलं धयादीगु दु ।
कार्यसम्पादन सम्झौता मार्गनिर्देशक निर्देशिका जूगुलिं ग्राहकतय्त बीगु सेवाय् सुधार व ज्याकू दुने जुइगु ज्याय् चुस्तता वयाः समग्रं रुपं संस्थाया प्रशासनिक व वित्तीय अवस्थाय् सकारात्मक प्रभाव लाइगु प्राधिकरणं आशा यानातःगु दु । हरेक क्षेत्रीय कार्यालय व वया मातहतया वितरण केन्द्रयात चुहावत नियन्त्रण, औसत महसुल संकलन अवधि म्हो यायेगु विषययात मू लक्ष्य निर्धारण यानातःगु दु ।
कार्यसम्पादनया मूल्यांकन हरेक ४–४ महिनाय् जुइगु खँ धाःगु दु ।सम्झौता कथं थःगु वितरण केन्द्रपाखें चुहावट व बक्यौता असुलीइ बियातःगु लक्ष्य म्होतिं नं ५० प्रतिशत प्रगति चूलाकल कि प्रमुखयात निश्चित नगद प्रोत्साहत भत्ता कथं बीगु व्यवस्था यानातःगु दु । अथेहे लक्ष्य चूलाकल धाःसा बढुवाय् उकिया नम्बर नं जोडे यायेगु, विदेशय् आयोजना तामिल, सेमिनारय् वनेगुली प्राथमिकतातय् तयेगु खँ नं सम्झौताय् उल्लेख दु ।
अथेहे ५० प्रतिशत स्वयां म्हो लक्ष्य हासिल यात धाःसा कमजोर कार्यसम्पादन माने यानाः व हे कथं नम्बर बीगु व नगद व गैरनगद प्रोत्साहन छुं नं मबीगु खँ धाःगु दु ।प्राधिकरणं वंगु छुं ई न्ह्यव निसें विद्युत चुहावट नियन्त्रणय् उपलब्धि चूलाका वयाच्वंगु दु । वंगु असार महिनाय् तक प्राधिकरणया प्रणालीं औसत २०.४५ प्रतिशत चुहावट दु । प्राधिकरणं औसतय् ४ प्रतिशत जक विद्युत चुहावटया जुइकेगु लक्ष्य तयातःगु दु ।
LEAVE YOUR COMMENTS