गौतमबुद्ध विमानस्थल दयेके ज्या ६० प्रतिशत क्वचाल

येँ – गौतमबुद्ध विमानस्थल दयेके ज्या ६० प्रतिशत क्वचाःगु दु । ल्यं दुगु ४० प्रतिशत ज्या क्वचायेकाः वइगु साउनया निगूगु वाः निसें अन्तर्राष्ट्रिय उडान यायेगु तयारी सरकारं यानाच्वंगु दु ।धावनमार्गय् पीच यायेगु ज्या निलाया दुने क्वचायेकेगु कथं ज्या जुयाच्वंगु दु । धावनमार्ग पीच यायेगु ज्या क्वचायेवं आयोजनाया भौतिक निर्माण प्रगति ७५ प्रतिशत स्वयां अप्वः थ्यनीगु खँ धाःगु दु ।

विमानस्थलया धावनमार्ग पीच यायेगु ज्या युद्धस्तरय् न्ह्याकाच्वनागु खँ आयोजनां धाःगु दु । न्हापांगु चरणया पीच यायेगु ज्या क्वचायेकाः आः निगुगू चरणया पीच यायेगु ज्या जुयाच्वंगु दु । स्वंगुगू व प्यंगुगू चरणया पीच यायेगु ज्या क्वचायेवं विमानस्थल उडान व अवतरणया निंतिं योग्य जुइ ।

आयोजनां बिउगु जानकारी कथं थौंकन्हय् टर्मिनल भवनया ढलान यायेगु ज्या क्वचायेधुंकूगु दु । अथे हे ट्याक्सी वे, एप्रोनया ज्या नं क्वचायेधुंकूगु दु । विमानस्थलया पूर्वभागं पीच यायेगु ज्या जुयाच्वंगु व वइगु नीन्हुया दुने ज्या क्वचाइगु खँ धाःगु दु । अथेहे नेभिगेसन व मेगु अत्यावश्यक भवनया ज्या नं लिपांगु चरणय् थ्यंगु दुसा गोदाम व कार्गो भवन दयेकेगु निंतिं ज्या शुरु यायेगु तयारी जुयाच्वंगु दु ।

राष्ट्रिय गौरवया आयोजना कथं कयातःगु थुगु आयोजना दकलय् न्हापांखुसी इलय् क्वचायेत्यंगु आयोजना जूगु खँ धाःगु दु । पर्यटन नागरिक तथा उड्डयन मन्त्री रविन्द्र अधिकारीया कथं स्वनिगलं पिने अन्तर्राष्ट्रिय विमानस्थल सञ्चालन वयेत्यंगु खँ कनादीगु दु ।

उगु आयोजना ठेकेदार व स्थानीय ठेकेदारया विवादया कारणं आयोजनां समस्या वयाच्वंगु खःसा लिपांगु गुलाया दुने न्ह्यथनेबहः कथं प्रगति जूगु दु । मन्त्री अधिकारीया कथं दातृ निकाय, निर्माण कम्पनी, स्थानीय समुदायलिसे निरन्तर संवादपाखें समस्या ज्यंकाः ज्या न्ह्याकूगु खः ।