कन्हय् निसें हस्तकला ब्वज्या, डिजाइन प्रक्षेपण न्ह्यब्वइगु
येँ – झिंखुक्वःगु हस्तकला ब्वज्याय् आकिवं सन् २०१९÷२०य् चले जुइफइगु हस्तकलाया डिजाइन प्रक्षेपण यानाः ब्वइगु जूगु दु । कन्हय् निसें जुइत्यंगु ब्वज्याया बारे जानकारी बीगु निंतिं सोमवाः जूगु पत्रकार सम्मेलनय् होमडेकोर अन्तर्गत टेक्स्टाइल, सेरामिकया लिसें प्राकृतिक रेसा व फेसन एसेसरिज व तिसाज्वलंयात निगू ब्वय् ब्वथलाः आकिवं चले जुइफइगु डिजाइन प्रक्षेपण यानाः क्यनीगु जानकारी बिउगु खः ।
हस्तकला ः समृद्धिया सम्भावना धयागु नारा बियाः भृकुटी मण्डपय् झिंखुक्वःगु हस्तकला व्यापार मेला व झिंप्यक्वःगु कला धेंधेंबल्लाः जुइत्यंगु खः । नेपाल हस्तकला व्यापार महासंघया ग्वसालय् जुइगु ब्वज्या कन्हसंनिसें मंसिर २ गते जुइ ।
पत्रकार सम्मेलनय् न्ववासें महासंघया अध्यक्ष धर्मराज शाक्यं नेपाःया हस्तकलायात अन्तर्राष्ट्रिय रुपं प्रवद्र्धन यायेगु ताः तयाः ब्वज्या जुइत्यंगु खँ कनादिल । ब्वज्याया झ्वलय् अन्तर्राष्ट्रिय रुपं प्रवद्र्धन यायेगु निंतिं चीनया न्हिपौ ‘चाइना डेली’ खुम्ह पत्रकारत ब्वज्या स्वयेत नेपाः वयेत्यंगु खँ नं वय्कलं कनादिल । ब्वज्याय् जापान, चीन, कुवेत, श्रीलंका, भारतया प्रतिनिधिपिंसं नं ब्वति काइगु व अनया व्यापारीत लिसे थनया व्यवसायीतय्सं प्रत्यक्ष व्यापार बारे सहलह यायेफइगु खँ नं वय्कलं धयादिल ।
अथेहे ब्वज्याया संयोजक व निर्वमान अध्यक्ष हेमरत्न शाक्यं थुगुसीया ब्वज्याय् छगू लाख न्यय्द्वः स्वकुमित वइगु अनुमान दुगु खँ कनादिल । थगुने जूगु ब्वज्याय् च्यागू करोडया कारोवार जूगु खँ कनादिसें वय्कलं थुगुसी झिगू करोड तका बराबरया कारोवार जुइगु अनुमान नं यानादीगु दु । वय्कःया कथं ब्वज्याय् निसःगू स्टल दइ, गुकी नीगू विदेशीतय् जुइ । अथे हे खुगू पवेलियन दइ । खुगू पवेलियनय् उत्कृष्ट जूपिंत सिरपाः नं बीगु जूगु दु ।
संयोजक शाक्यं थुगुसीया ब्वज्याय् न्हय्गुलिं प्रदेशया सहभागिता दइगु खँ नं कनादिल । अथेहे ब्वज्याया झ्वलय् नेपाली हस्तकला उद्योग व्यवसायया विकास, विस्तार व प्रवद्र्धनया निंतिं निरन्तर क्रियाशील जुयाः विशेष योगदान यानादीपिं उद्यमी, उत्कृष्ट निकासीकर्ता, उत्कृष्ट कलाकारयात सम्मान नं याइगु जूगु दु ।
ब्वज्याया झ्वलय् निगू विधाय् कलाकार व कालिगढतय्सं प्रत्यक्ष रुपं हस्तकलाया सामान दयेकेगु धैधेंबल्लाः नं जुइ । धेंधेंबल्लाःया संयोजक व महासंघया उपाध्यक्ष प्रचण्ड शाक्यं परम्परागत व समसायिक यानाः निगू विधाय् धेंधेंबल्लाः जुइगु खँ कनादिल । परम्परागत विधा अन्तर्गत मैनया मूर्ति दयेकेगु व समसामयिक विधा अन्तर्गत ढाकाया कापःयात कयाः धेंधेंबल्लाः जुइ । छगू विधाय् झिंन्याम्ह झिंन्याम्ह कलाकारतय्सं ब्वति काइगु थ्व धेंधेंबल्लाखय् ब्वति काःपिंसं ब्वज्याया झ्वलय् प्रत्यक्ष रुपं हे हलंज्वलं दयेकाः क्यनी ।
पत्रकार सम्मेलन न्ववानादिसें महासंघया वरिष्ठ उपाध्यक्ष किरण कुमार डंगोलं नेपाःयात अन्तर्राष्ट्रिय रुपं म्हसिका बियाच्वंगु हस्तकलाया प्रवद्र्धनय् सरकारं बेवास्ता यानाच्वंगु खँय् चिन्ता प्वंकादिल । नेपाः सरकारयाके हस्तकला निर्यात यायेगु नीति हे मदु धासें वय्कलं हस्तकला प्रवद्र्धनया निंतिं सरकारं अविलम्ब ज्या यायेमाःगु खँ धयादिल ।
यल नगर ‘क्राफ्ट सिटी’ घोषणा याइगु
येँ -यल नगरयात ‘क्राफ्ट सिटी’ घोषणा याइगु जूगु दु । वल्र्ड क्राफ्ट काउन्सिलं हे यल नगरयात क्राफ्ट सिटी घोषणा यासें थुकिया प्रमाणपत्र बीत्यंगु खः । हस्तकला ब्वज्याया झ्वलय् वल्र्ड क्राफ्ट काउन्सिलया एसिया प्यासेफिक अध्यक्ष नेपाः वयाः यल महानगरपालिकाया मेयर चिरिबाबु महर्जनयात सर्टिफिकेट लःल्हाइगु खँ हस्तकला महासंघया अध्यक्ष धर्मराज शाक्यं धयादीगु दु ।
LEAVE YOUR COMMENTS