युक्रेनं ज्वनातःपिं न्याम्ह नेपाःमि सकुशल

येँ (नेपालभाषा टाइम्स) रुस–युक्रेन युद्धय् युक्रेनी सेनाया कब्जाय् लाःपिं न्याम्ह नेपाःमि सकुशल दुगु पुष्टि जूगु दु । रुसी सेनाय् गैरकानुनी रुपय् भर्ना जूपिं बर्दियाया विवेक खत्री, काभ्रेया सिद्धार्थ ढकाल, मोरङया विकास राई, रोल्पाया प्रतीक पुन व गोरखाया ईश्वर लामिछाने युद्धया झ्वलय् युक्रेनी सेनाया कब्जाय् लाःगु खः । परराष्ट्र मन्त्रालयंया कथं युक्रेन सरकारया प्रतिनिधिं न्याम्हं नेपाःमियात छथाय् तयाः बयान काःगु खँ धाःगु दु ।

बयान बीगु झ्वलय् नेपाःमिपिंसं युक्रेनं त्वःतलकि रुस वनेगु व सैन्य सम्झौता रद्द यानाः नेपाः लिहां वनेगु बाचा याःगु खँ युक्रेनया सरकारी प्रतिनिधिं परराष्ट्र मन्त्रालययात पौ च्वयाः जानकारी बिउगु दु । मन्त्रालयं युक्रेन सरकारं थुपिं नेपाःमितय्त गबलय् त्वःतीगु खः धयागु खँ धाःसा क्वःमजिउनिगु खँ धाःगु दु ।