ने. सं. ११४६ बछलाथ्व तृतीया - अक्षय तृतीया, भिक्षु प्रज्ञानन्द महास्थविरया १२६ क्वःगु बुदिं

देय् दबू यल जिल्लाया न्हापांगु तःमुँज्या

यल(नेपालभाषा टाइम्स)- नेवाः देय् दबू यल जिल्ला समितिया न्हापांगु तःमुँज्या वंगु शनिवाः जुल । त्यागः, पिलाछेँस्थित नेपालभाषा मंकाः खलः भवनय् उगु तःमुँज्या जूगु खः । देय् दबू यल जिल्ला समितिया नायः हिराकाजी महर्जनया सभापतित्वय् नेवाः देय् दबूया नायः पवित्र वज्राचार्य मूपाहांकथं झायादीगु तःमुँज्या वय्कलं त्वाःदेवाय् मत च्याकाः उलेज्या यानादीगु खः ।

ज्याझ्वलय् नवासें देय् दबूया नायः वज्राचार्यं नेवाः आन्दोलनं झीत न्ह्याबलें सक्षम यानाच्वनी धासें नेवाःत राजनीतिक रुपं सचेत जुइमाःगु खँय् बः बियादिल । वय्कलं झी नेवाःत राजनीतिक रुपं सचेत मजूगलिं हे लिउने लानाच्वंगु खः धासें झीसं आः नं वाः चायेके मफुत धाःसा झी आः स्वयां नं लिउने लाः वनीगु अवस्था वइ धयादिल ।

देय् दबूया केन्द्रीय सल्लाहकारनापं विशेष पाहां डा. पुष्पराज राजकर्णिकारं येँ महानगरपालिकां तत्कालीन इलय् खस् नेपाली भाय् सरह नेपालभाषायात नं मान्यता बीगु निर्णय याःगु तर उकियात छथ्वः महिताःतय्सं संविधानया हे अपव्याख्या यानाः लिकायेकूगु धासें आः नं थीथी जातिया हक अधिकार संविधानय् जक सीमित जुयाच्वंगु दु धयादिल । वय्कलं संविधानय् सीमित जुयाच्वंगु अधिकार प्राप्तिया निंतिं राजनीतिक अभ्यासया कुतः यायेमाःगु व थथे मजुइकं अधिकार प्राप्त याये फइमखु धयादिल ।

देय् दबूया न्वकु उमेश स्थापितं देय् दबूया वर्तमान संगठनात्मक संरचनाया बारे ध्वाथुइकादिसें नेवाःतय्त आदिभूमिं विस्थापित याना यंकाच्वंगुया कारणं विकास निर्माणय् गैर नेवाःत हावी जूगुलिं खः धयादिल ।

यल जिल्ला समितिया न्वकु रविन्द्र शाक्यं लसकुस यासें न्ह्याःगु ज्याझ्वलय् ज्यापु महागुथि नेपाःया केन्द्रीय न्वकु अष्टमान महर्जन, नेवाः देय् दबू येँ जिल्लाया नायः धनबहादुर महर्जन तिमिला, देय् दबू राष्ट्रिय परिषद्या दुजः शरणगोपाल डंगोल, वरिष्ठ समाजसेवी मोतिलाल शिल्पकार, नेपालभाषा मंकाः खलः यलया पुलांम्ह नायः ऋषिप्रसाद श्रेष्ठ, देय् दबू स्वनिगः विशेष प्रदेशया नायः श्रीकृष्ण महर्जन लगायतं भिंतुना न्वचु बियादीगु खः ।

उगु तःमुँज्यां रविन्द्र शाक्यया अध्यक्षताय् न्हूगु ज्यासना पुचः नं ल्यःगु खः । नीछम्हेसिया न्हूगु ज्यासना पुचलय् कृष्णभक्त डंगोल वरिष्ठ उपाध्यक्ष, मदन श्रेष्ठ उपाध्यक्ष, बुद्धिलक्ष्मी महर्जन सचिव व नानीहेरा शाक्य कोषाध्यक्षय् च्वनादीगु दु ।

दुजलय् राजु शाक्य, अमिनराज महर्जन, रमिता वज्राचार्य, रमेश तण्डुकार, सुरज तण्डुकार, बाबुराजा वज्राचार्य च्वनादीगु दु । थुकथं हे मेपिं दुजलय् निर्मल डंगोल, दशराज तण्डुकार, पशुपति तुलाचन, सुदन शाक्य, चन्द्रकमल श्रेष्ठ, अनिता अवाले, राम महर्जन, सविता डंगोल, महेन्द्रकुमार महर्जन व अस्तेन्द्रकुमार महर्जन च्वनादीगु दु ।