ने. सं. ११४० तछलाथ्व अष्टमी

जैशिदेवल क्लबया रजत महोत्सवय् खुल्ला चित्रकला च्वज्या कासा

येँ – जैसिदेवल युथ क्लब २५ दँ क्यंगु रजत महोत्सवया लसताय् छगू खुल्ला चित्रकला च्वज्या कासा जुल । खुदँ निसें झिखुदँया मस्तय् दथुइ जूगु चित्रकला कासायात निगू पुचलय् ब्वथलाः उगु कासा याःगु खः । खुदँनिसें झिंनिदँ तकया मस्तय् दथुइ जूगु चित्रकला च्वज्या कासाय् श्रीकुमारि सेकेन्डरी स्कुलया प्रसेनजीत शाक्य, ग्रीनपीस एकेदमिया श्रृष्टिना डंगोल व ज्याःबहाः ल्याय्म्ह पुचःया आरुष कारंजित छसिकथं न्हाप, लिउ व लियांलिउ लाःगु खःसा राइजिंग स्टारया विशेष कारंजितं हःपाः सिरपाः त्याकादीगु खः ।
अथे हे झिंस्वदँ निसें झिंखुदँ दुपिनिगु दथुइ जूगु चित्रकला च्वज्या कासाय् कुमुदिनी कुञ्ज स्कुलया स्मृति महर्जन न्हाप, श्रीकुमारि स्कुलया लक्ष्मी पोडे लिउ, नेपाल आदर्श माध्यमिक विद्यालयया मुस्कान कुमारि लियांलिउ व ग्रीनपीस एकेदमिया सोमिला महर्जनं हःपाः सिरपाः त्याकादीगु खः ।
क्लबया नायः राजेश प्रजापतिया सभापतित्वय् रजत महोत्सवया लसताय् जूगु ज्याझ्वलय् कासाय् विजेता जुयादीपिंत मूपाहां येँ महानगरपालिकाया प्रमुख विद्यासुन्दर शाक्यं सिरपाः व दसिपौ लःल्हानादीगु खः । ज्याझ्वलय् विशेष पाहांकथं येँ मनपा २१ वडाअध्यक्ष उदयचुडामणि वज्राचार्य, नेपालभाषा मैत्री समाजया नायः प्रेम लस्कर, स्थानीय समाजसेवाी प्रविणबहादुर श्रेष्ठ झायादीगु खः ।
क्लबया मूछ्यांजे चन्द्रगोपाल प्रधानं लसकुस यानादीगु ज्याझ्वलय् मूपाहां, विशेष पाहांलिसें मेपिं पाहांपिं व क्लबया सल्लाहकार सुदन प्रधानं थःथःगु नुगःखँ तयादीगु खः ।
थीथी क्लब, संघसंस्था व स्कुलया विद्यार्थीतय्सं ‘कला व परम्परा’ व ‘वातावरण व लः’ विषयय् २१६ पाः किपा च्वयाः दुथ्याकूगु खः । चित्रकला च्वज्या कासा प्रमेशबहादुर श्रेष्ठया संयोजकत्वय् जूगु खः ।