फागुन २५ गते राष्ट्रपतिया चुनाव
येँ (नेपालभाषा टाइम्स)- निर्वाचन आयोगं थ्वहे वइगु फागुन २५ गते राष्ट्रपतिया निर्वाचन यायेगु घोषणा याःगु दु । म्हिगः पत्रकार सम्मेलन यासें आयोगं राष्ट्रपति व उपराष्ट्रपति निर्वाचनया तिथि क्वःछिउगु खः ।
निर्वाचन आयोगया प्रवक्ता शालिग्राम शर्मा पौडेलं राष्ट्रपति व उपराष्ट्रपतिया निर्वाचन न्हय्गुलिं प्रदेशय् मतदान यायेगु कथं तयारी याःगु खःसां तत्काल सम्भव मदुगुलिं येँय् हे मतदान जुइगु खँ कनादिल ।
निर्वाचनया नितिं फागुन १० गते मतदाता नामावली पिथनेगु, १० व ११ गते दावी विरोध व उजुरी बीगु, ११ व १२ गते उजुरीयात कयाः छानविन यायेगु कार्यतालिका दयकूगु दु ।
अथे हे फागुन १२ गते अन्तिम मतदाता नामावली पिथनेगु, १३ गते मनोनयन पत्र दर्ता यायेगु, १३ गते हे उम्मेदवार धलः पिथनेगु, १४ गते उम्मेदवार बिरुद्ध उजुरी बीगु, १४ व १५ गते उजुरीयात कयाः छानबिन यानाः निर्णय बीगु ज्याझ्वः दु ।
उकथं हे फागुन १५ गते उम्मेदवारया नां पिथनेगु, १६ गते नां लित कायेगु, १६ गते उम्मेदवारया अन्तिम धलः पिथनेगु व २५ गते मतदान जुइ । उकथं हे उपराष्ट्रपतिया निर्वाचन चैत ३ गते जुइगु खँ नं आयोगं धाःगु दु । उकिया निंतिं मनोनयन दर्ता फागुन २७ गते जुइ ।
संविधान कथं राष्ट्रपति व उपराष्ट्रपतिया कार्यकाल क्वचाये स्वयां लछि न्ह्यः हे निर्वाचन यायेमाःगु खःसां राजनीतिक पार्टीतय् राष्ट्रपति व उपराष्ट्रपति दयेकेगु खँय् सहमति मजूगुलिं लिबाःगु खः ।
माओवादीं राष्ट्रिय सहमति कथं राष्ट्रपति ल्ययेमाः धयाच्वंगु दुसा एमालें न्हापा जूगु सहमति कथं थःपिंत राष्ट्रपति माः धयाच्वंगु दु । नेपाली कांग्रेसं प्रधानमन्त्री दाहालयात विश्वासया मत बियागु आधारय् कांग्रेसयात राष्ट्रपति दयेकेमाः धयाच्वंगु दु ।
LEAVE YOUR COMMENTS