ने. सं. ११४४ ञलाथ्व दशमी -

बागमति प्रदेश सांसद हना

यल(नेपालभाषा टाइम्स)- ज्यापु महागुथि यल जिल्ला समितिं बागमति प्रदेश सभाय् निर्वाचित सांसदया हनेज्या याःगु दु । समितिं यल जिल्ला निर्वाचन क्षेत्र नं ३ (क)पाखें निर्वाचित रघुनाथ महर्जन व क्षेत्र नं ३ (ख)पाखें निर्वाचत पे्रमभक्त महर्जनयात भिंतुना देछासे हनेज्या याःगु खः ।

महागुथिया यल जिल्ला समितिया न्हापांम्ह न्वकु शरणगोपाल डंगोलया सभापतित्वय् न्वकु बाबुकृष्ण महर्जनं लसकुस यासें न्ह्याःगु ज्याझ्वलय् नवनिर्वाचित प्रदेश सांसदद्वययात नेवाः परम्पराकथं ख्यें सगं बियाः भिंतुना देछाःगु खः ।

ज्याझ्वलय् नवासें नवनिवाचित प्रदेश सांसद रघुनाथ महर्जनं स्वनिलय् बुलुहुं तना वनाच्वंगु नेपालभाषा दक्व स्कुलय् स्थानीया पाठ्यक्रमया रुपय् पठनपाठन याकेगु ज्या न्ह्याके फत धाःसा नेवाः भाय् उत्थानया निंतिं तःधंगु योगदान जुइ फइगु विचाः तयादिल । लिसें वय्कलं थुगु ज्याया निंतिं थम्हं फक्व पहल यायेगु व उकिया निंतिं माःकथंया भूमिका म्हितेगु जुइ धासें नेवाःतय्सं न्हियान्हिथं छ्यलीगु लवःकवः नं तना वनाच्वंगुलिं उकिया सचित्र सफू पिकाये फत धाःसा संरक्षणया ज्याय् तिबः जुइगु विचाः प्वंकादिल ।

नवनिर्वाचित मेम्ह प्रदेश सांसद पे्रमभक्त महर्जनं नेपालभाषा, संस्कृति, संस्कार प्रवद्र्धनया निंतिं नीतिगत रुपं यायेमाःगु ज्याय् फक्व विशेष पहल यायेगु नापं नेवाः भूमि व हक अधिकारनाप स्वानाच्वंगु ज्याखँयात ध्यानय् तयाः ज्या याना वनेगु प्रतिवद्धता प्वंकादिल ।

ज्याझ्वलय् महागुथिया केन्द्रीय दुजः अष्टमान महर्जन यल जिल्ला समतिया संरक्षक ज्ञानकुमार महर्जन, यल जिल्ला समितिया छ्याञ्जे राममान महर्जनं नं नुगः खँ तयादीगु खः । नवनिर्वाचित प्रदेश सांसद रघुनाथ यल जिल्लाया नायः खःसा पे्रमभक्त पुलांम्ह केन्द्रीय दुजः खः ।