येँ महानगरपाखें लछिया दुने कर पुलेत सुचं जारी

येँ – येँ महानगरपालिकां छेँबुँ व सम्पत्तिया कर बुझे मयाःपिं करदातायात लछिया सुचं जारी याःगु दु । महानगरपालिकां सम्पत्ति कर बुझे मयाःपिं ५२ करदातायात ३० न्हुया सुचं बियाः नां सार्वजनिक याःगु खः ।

येँ महानगरपालिका राजस्व विभागं ताःई न्ह्यवंनिसें सम्बन्धित वडापाखें ताकेता यायेगु ज्या जूसां उकियात वास्ता मयासे च्वनाच्वंगुलिं नां सार्वजनिक यायेमाःगु स्पष्ट याःगु दु । विभागया प्रमुख डा. शिवराज अधिकारीं स्वीन्हुया ई बियाः नां सार्वजनिक याःपिं करदातां उगु ई दुने करया विवरण, कर व जरिवाना बुझे मयात धाःसा सेवा बन्द यायेगु जुइ धयादिल ।

वय्कलं धयादिल, ‘नां सार्वजनिक याःपिं करदातां ३० न्हुया दुने नं करया विवरण, कर व जरिवाना बुझे मयात धाःसा सेवा बन्द यायेगु जुइ । उलि जक मखसे इमिगु सम्पत्ति रोक्का यायेगु नापं कानूनी प्रक्रियापाखें सरकारी बाँकीसरह कर असुल यायेगु जुइ ।’

थ्व स्वयां न्ह्यः जारी याःगु सुचंपाखें सम्पर्कय् मवःपिनिगु सेवा बन्द यायेगु जुइ धासें वय्कलं थ्व स्वयां न्ह्यः वंगु असार १६ गते नां सार्वजनिक याःपिंमध्ये अप्वःथें धाःसा सम्पर्कय् वःगु खँ कनादीगु दु ।

सम्पर्कय् वःपिंमध्ये गुलिसिनं न्हापांगु किस्ता वापतया कर बुझे याःगु, गुलिसिनं विवरण बुझे याःगु व सम्पर्कय् वःपिंमध्ये गुलिसिनं धाःसा कर पुलेत ई माग याःगु जानकारी वय्कलं बियादिल ।

विभागयाकथं अझं गुलिखे करदाता सम्पर्कय् वःगु मदुनि । सम्पर्कय् मवःपिं अज्याःपिं करदाताया सेवा बन्द यायेगु तयारी विभागं यानाच्वंगु दु । कर पुलेत धासें नां सार्वजनिक याःपिं करदातातय्त मौखिक रुपं सुचं जारी याःगु दु । थुकथं बिउगु सुचंया ई सिधये न्ह्यः कार्यस्थलय् हे वनाः माइकिङ तकं याःगु खः ।

विभागया कथं सरकारी निकाय खाद्य संस्थान, राष्ट्रिय नाचघर, कर्मचारी संचय कोष भवन, नेपाल रेडक्रस सोसाइटी, नेपाली जामे मस्जिद, नेपाल स्काउट, सिनेमा हल, नांजाःगु ब्वनेकुथि, होटल, अस्पताल, कारखाना, मल लगायत ५२ गू करदातायात स्वीन्हुया सुचं जारी याःगु खः ।