मई १ तारिखं तातोपानी चायेकीगु

येँ – तःभुखाचय् लिपा बन्द जुयाच्वंगु सिन्धुपाल्चोकया तातोपानी नका चायेकेगु ज्या तीव्र गतिं न्ह्यानाच्वंगु दु । प्यदँ तक बन्द जूगु नाका सन् २०१९ या मे १ तारिखय् चायेकाः हस्तान्तरण यायेगु कथं ज्या जुयाच्वंगु दु । विसं २०७२ वैशाखया भुखाचं व २०७३ असारया भोटेकोशीया खुसिबालं स्यंगु बाह्रबिसे तातोपानी २६ किलोमिटर सडक खण्डया मर्मत यायेगु ज्या तीव्र गतिं जुयाच्वंगु दु ।

वइगु मे १ तारिख कुन्हु नाका चायेकेगु आज्जु कथं न्हिं द्वःछि स्वयां अप्वः जामितय्सं ज्या यानाच्वंगु दु । भुखाचं क्षति जूगु मितेरी तां साविक ८ मिटर चौडाइयात अप्वयेकाः १२ मिटर दयेकेगु कथं ज्या जुयाच्वंगु दु । येँनं चीन स्वाइगु दकलय् चीहाकःगु लँपु ११४ किलोमिटर ताःहाः । लँ दयेकेगु ज्या क्वचायेवं सुनसान जुयाच्वंगु तातोपानी बजाः हाकनं पुलांगु स्थितिइ थ्यनीगु विश्वास स्थानीय वासिन्दां यानाच्वंगु दु ।