क्यानेडियन नेवाः गुथिया समय्बजि व सांस्कृतिक ज्याझ्वः

येँ – क्यानेडियन नेवाः गुथिया ग्वसालय् यँयाःपुन्हिया लसताय् लाकाः दँय्दसं थें थुगुसी नं तःजिक समय्बजि व सांस्कृतिक ज्याझ्वः जुल ।
थ्व हे वंगु अगस्ट २४ शनिवाःकुन्हु जूगु ज्याझ्वलय् ब्राम्टन नगरया प्रमुख प्याट्रिक ब्राउन मूपाहांकथं झायादीगु खः । उगु ज्याझ्वः मूपाहां ब्राउनलिसें सांसद सोनिया सिन्धु, ब्रोक विश्वविद्यालयया प्रा.डा. टम ओ’नील व गुथिया नायः प्रकाश प्रधानं मंकाःकथं उलेज्या यानादीगु खः ।

ज्याझ्वलय् ब्वति कायेत वःपिं पाहांपिंत परम्परागत नेवाः वसतय् धिमय् थाना लसकुस यायेगु ज्या जूगु खःसा मूपाहां पाहांपिंत तगः तपुलि व गां न्ययेकाः मू ज्याझ्वः जूगु थाय् ब्राम्टनया चिन्कुजि पार्कतक यंकूगु खः । गुथिया नायः प्रधानं लसकुस यासें न्ह्याःगु ज्याझ्वःया बारे मूछ्याञ्जे विमलप्रसाद श्रेष्ठं जानकारी बियादीगु खः ।

ज्याझ्वलय् विश्वविद्यालयया प्रा. डा. ओ’नीलं नेवाः भाय्या विकासया निंतिं सहकार्य यायेत थःपिं न्ह्याबलें तयार दुगु खँ कनादीगु खःसा मूपाहां लगायत पाहांपिंसं देसं पिने च्वनाः नं नेवाः भाय्, संस्कृति व संस्कारया विकासया निंतिं गुथिं याना वयाच्वंगु ज्यायात कयाः च्वछायादीगु खः ।

समय्बजिलिसें सांस्कृतिक ज्याझ्वः नं न्ह्यब्वःगु ज्याझ्वलय् हिमालयन भाइब्सलिसें मेमेपिंसं थीथी नेवाः लोकसांस्कृतिक म्येँ, नेवाः धुननापं यँयाःया आकर्षणया रुपय् दयाच्वंगु पुलुकिसि प्याखं नं न्ह्यब्वःगु खः । नेवाः संस्कृति व सम्पदा संरक्षणया विषयय् अन्तक्र्रिया नं जूगु ज्याझ्वलय् नरेश ताम्राकार व मौसमी ताम्राकारं सकसिगुं न्ह्यःने जेरि छुनाः नकूगु खःसा थीथी कासा म्हितेगु व प्रदर्शनी नं याःगु खः ।

उगु हे ज्याझ्वलय् वाद्यवादक सानुराजा महर्जन, हुलाप्याखं स्यनामि बिजु सिं महर्जन व नेवाः बौद्ध धर्मय् पीएचडी यानादीम्ह नापं चचा प्याखंया प्रशिक्षकतकं जुयादीम्ह क्यानेडियन नागरिक आम्बर मारियात नं हनेज्या याःगु खः ।

दकलय् लिपांगु ब्वय् ज्याझ्वःया कजि सुरेन्द्रलाल श्रेष्ठं मूपाहां ब्राम्टन नगर प्रमुख ब्राउन, कलाकार, प्रायोजक व ब्वति कयादीपिं सकसितं लाखामरि देछानादीगु खः । ज्याझ्वलय् न्यासः स्वयां अप्वःसिनं ब्वति काःगु गुथिया मूछयाञ्जे श्रेष्ठं जानकारी बियादीगु दु ।