किपू नगरपालिकाया मेयर राजकुमार नकःमि मंत

किपू(नेपालभाषा टाइम्स)- किपू नगरपालिकाया मेयर राजकुमार नकःमि मंत । मेयर नकःमि वीर अस्पतालय् वासः याकेगु झ्वलय विहीवाः बहनि मदुगु खः ।

किपू नगरपालिकाया प्रमुख प्रशासकीय अधिकृत माधव प्रसाद ढकालं वीर अस्पतालय् वासः याकाच्वनादीम्ह मेयर नकःमि विहीवाः बहनि करिब ९ ताः इलय् मदुगु जानकारी बियादीगु दु ।
ताःई न्ह्यःनिसें जँलास्येँया ल्वचं पीडित जुयाच्वनादीम्ह मेयर नकःमि लिपांगु इलय् स्वास्थ्य समस्या जुइवं वीर अस्पतालय् वासः याकाच्वनादीगु खः । मेयर नकःमि मदुगु दुःखय् किपू नगरपालिकां थौं नगरपालिका न्यंकं शोक विदा बिउगु दु ।

मदुम्ह मेयर नकःमिया सीम्ह आः सुथय् ९ ताः इलंनिसें अन्तिम श्रद्धाञ्जलीया निंतिं किपू नगरपालिकाय् तइगु जूगु दु । वयां लिपा थौं हे वय्कःया अन्त्येष्ठी याइगु जूगु दु ।

ताःई न्ह्यःनिसें जँलास्येँया ल्वचं पीडित जुयाच्वनादीम्ह वय्कःया लिपांगु इलय् समस्या जुइवं वंगु साउन २ गते वीर अस्पतालय् वासः यायेत भर्ना जुयादीगु खः । वय्कलं साउन १ गते हे उपप्रमुख सुनिता शाक्य कार्यवाहक मेयरया जिम्मेवारी बियादीगु खः ।

नकःमिया निधनलिसें किपू नगरपालिकाय् प्यम्ह जनप्रतिनिधि प्वंगु दु । थ्व स्वयां न्ह्यः वडा नं. १ व ४ या वडाअध्यक्ष व कार्यपालिकाया दुजः श्याम दानकोटी नं मदयेधुंकूगु दु ।
मदुम्ह नकःमिया जहानलिसें काय छम्ह व म्ह्याय् छम्ह दी ।