संघीयता कार्यान्वयनय् प्रतिबद्धता दु ः प्रम
येँ (रासस)÷ प्रधानमन्त्री व राष्ट्रिय समन्वय परिषद्या अध्यक्ष पुष्पकमल दाहालं परिवर्तनया मू संवाहक जूगु नातां थः संघीयता कार्यान्वयनय् दृढतापूर्वक लगे जुइगु प्रतिबद्धता प्वंकादीगु दु । सिंहरदबारस्थित प्रधानमन्त्री व मन्त्रिपरिषद कार्यालयय् बुधवाः जूगु राष्ट्रिय समन्वय परिषद्या निक्वःगु पूर्ण बैठकयात सम्बोधन यानादिसें प्रधानमन्त्री दाहालं थ्व खँ धयादीगु खः ।
‘संघीयता कार्यान्वयनया खँय् मुख्यमन्त्रीतय् जि प्रति विश्वास दु, थ्व हे शक्तियात ज्वनाः संघीयता कार्यान्वयनय् वनेगु जुइ’ वय्कलं धयादीगु दु । थ्व झ्वलय् राष्ट्रिय समन्वय परिषद्सम्बन्धी कानुनु २०७६ सालय् हे दयेकूगु खःसां वंगु असारनिसें थःम्हं हे थुकिया न्हापांगु बैठक तयागु खँ नं वय्कलं धयादीगु दु ।
संघ, प्रदेश व स्थानीय सरकारया ज्याया समन्वय व सुदृढ यायेगु निंतिं परिषद्या बैठक तयागु खँ न्ह्यथँसें प्रधानमन्त्री दाहालं धाःगु दु, ‘प्यदँ तक छगू हे बैठक मच्वंसे ई फुकल । जिं खुलाया दुने निगू बैठक तयाः संघीयता कार्यान्वयनय् पहल यानागु दु ।’
संघीयता कार्यान्वयन यायेत थःम्हं मुख्यमन्त्रीतलिसे लगातागर छलफल याना वयाच्वंगु खँ न्ह्यथँसें प्रधानमन्त्री दाहालं संविधान कार्यान्वयनय् सकसितं चिउताः व चिन्तान यायेमाःगु खँय् बः बियादिल । थम्हं सरकारया नेतृत्व यायेधुंसां निसें थ्व हे विषययात केन्द्रय् तयाः ज्या याना वयाच्वनागु खँ धासें वय्कलं धाःगु दु, ‘थ्व बैठकं गति बिउगु अनुभूति जिं यानागु दु । जिप्रति सकलें मुख्यमन्त्रीपिनि आशा व भरोसा दु । संघीयता कार्यान्वयनया निंतिं थ्व हे जिगु शक्ति खः ।’
वय्कलं प्रहरी समायोजनाया निंतिं उपप्रधानमन्त्रीतय्त जिम्मेवारी हे तोके यानाः ज्या याकेधुनागु जानकारी नं बियादिल । ‘संघीय ऐन निर्माण हे झीगु प्रमुख कार्यभार खः । प्रदेशतय्सं जनतायात सेवा बीगु सुरु यातकि संघीयता विरोधीतय्त बांलाःगु लिसः जूवनी’ वय्कलं धाःगु दु ।
बैठकय् उपप्रधानमन्त्री व रक्षामन्त्री पूर्णबहादुर खड्कां संघीयता कार्यान्वयनय् प्रधानमन्त्रीं अग्रसरता काःगुलिं थ्व सम्बन्धय् अन्योलता चिलावंगु खँ धयादिल । वय्कलं धाःगु दु, ‘संघीयता कार्यान्वयनय् प्रधानमन्त्री गम्भीर जुयादीगु दु । निजामति ऐन हयेत प्रधानमन्त्रीया निर्देशन कथं जिं हे पहल यानाच्वनागु दु । थ्व हे संसद अधिवेशनं पारित याकेगु जुइ ।’ अथेहे उपप्रधानमन्त्री व गृहमन्त्री नारायणकाजी श्रेष्ठं संघीयता कार्यान्वयनया निंतिं प्रधानमन्त्रीं सकलें मन्त्रीपिंत याकनं ज्या यायेत निरन्तर प्रेरित यानाच्वंगु धासें प्रहरी समायोजनया प्रक्रिया न्ह्याः वनेधुंकूगु व छुं न्हि दुने हे समायोजन प्रक्रिया पूवंकेगु जुइ धयादीगु दु ।
LEAVE YOUR COMMENTS