ने. सं. ११४४ कौलाथ्व सप्तमी - फूलपाती

नेवाःतय् म्हसीका न्ह्यब्वइगु सफू नेवाः सांस्कृतिक ज्ञानकाेश पिदन

येँ (नेपालभाषा टाइम्स)- नेवाःतय् बारे पूवंक म्हसीका दुगु सफू ‘नेवाः सांस्कृतिक ज्ञानकोश’ या पितब्वज्या जूगु दु । येँ महानगरपालिकाया ग्वाहालिं नेपालभाषा एकेदेमिं पिथंगु थुगु ज्ञानकोशया विमोचन म्हिगः येँया राष्ट्रिय नाचघरय् जूगु तःजिगु ज्याझ्वःया दथुइ वरिष्ठ साहित्यकार, मूर्तिकार, संगीतकःमि, संस्कृतिविद्पिंसं मंकाः कथं यानादिल । ज्याझ्वलय् झायादीपिं मूपाहापिंसं सफू न्ह्यःने च्वंगु मन्दः पुज्यानाः, सफूयात जजंका क्वखायेकाः ज्ञानकोश सफूया पितब्वज्या यानादीगु खः ।

ज्याझ्वलय् वयोवृद्धपिं जनकवि दुर्गालाल श्रेष्ठ, क्रोधकला शिरोमणि कालु कुम्हाः, संस्कृतिविद् यज्ञमानपति वज्राचार्य, साहित्यकार सुवर्णकेशरी चित्रकार, संगीतकःमि श्रीगोपाल प्रजापतिपिंसं सफूया उलेज्या यानादीगु खः । नेवाःतय् बारे वृहद् रुपं म्हसीका बीगु थ्व सफू ‘नेवाः म्हसीका’, ‘संस्कृति व सम्पदा’, ‘भाषा, लिपि व साहित्य’, ‘म्ये, बाजं व प्याखं’ व ‘शिल्प, प्रविधि व ज्ञान’ यानाः न्यागू ब्वय् पिदंगु खः । ‘नेवाः म्हसीका’या विमोचन जनकवि श्रेष्ठ, ‘भाषा, ‘संस्कृति व सम्पदा’या विमोचन संस्कृतिविद वज्राचार्यं ‘भाषा, लिपि व साहित्य’ साहित्यकार चित्रकार, ‘म्ये बाजं व प्याखं’ वरिष्ठ संगीतकःमि श्रीगोपाल प्रजापति व ‘शिल्प, प्रविधि व ज्ञान’ क्रोधकला शिरोमणि कुम्हाः नं विमोचन यानादीगु खः ।

ज्याझ्वलय् न्ववानादिसें ज्ञानकोशया परिकल्पनाकार व नेपालभाषा एकेदेमिया भाइस चान्सलर मल्ल के सुन्दरं थ्व सफू नेवाः भासं च्वयातःगु मात्र आखःग्वःया सफू जक मखु, थ्व नेवाःतय् वृहत् रुपं म्हसीका बीगु सफू खः धयादिल । वय्कलं धयादिल, ‘थ्व सफू मात्र नेवाः भासं च्वयातःगु आखःग्वः जक मखु, थ्व ज्ञानकोशपाखें नेवाःत धयापिं सु खः, गनं वःगु खः, नेवाःतय् संस्कृति, जात्रा पर्व छु खः, गुबलय् जुइ, नेवाःतय् भाषा, लिपि, साहित्य छु छु दु, गथे दु; नेवाःतय् म्ये, बाजं, संगीत गज्याःगज्याःगु दु, नेवाःतय् पम्परागत शिल्प, प्रविधी छु खः धयागु फुक्क खँ सीकेफइ । उकिं थ्व छगू सफू जक मखु, नेवाःतय् आत्मा खः । नेवाःतय् आत्मा थें जूगुलिं नेवाःतय् म्हपुजा याइबलय् थें सफूयात नं मन्दः दयेकाः पुज्यानाः पितब्वज्या यानागु खः ।’

ज्याझ्वलय् जनकवि दुर्गालाल श्रेष्ठ, येँ महानगरपालिकाया संस्कृति तथा पर्यटन विभागया संयोजक व येँ महानगरपालिका ८ वडाया अध्यक्ष आशामान संगतपिंसं भिंतुना देछायादीगु खः । अथेहे ज्याझ्वलय् सभापतिया थासं न्ववासें येँ महानगरपालिकाया उपमेयर सुनिता डंगोल थपाय्सकं तःजिगु सफू पिथनेगु ज्याय् महानगरपालिकां सहकार्य यायेखंगु खँय् लसता प्वंकुसें थुगु सफू अंग्रेजी व खस नेपालीभासं अनुवाद यानाः पिथनेगु निंतिं येँ महानगरपालिकां ग्वाहालि याइगु खँ धयादीगु खः ।

न्यागू ब्वय् पिदंगु थ्व ज्ञानकोशया न्यागुलिं सफू यानाः थ्यंमथ्यं नीच्यासः पृष्ठ दु । ज्ञानकोशया ‘नेवाः म्हसीका’ ब्वया संयोजन शाक्य सुरेन, ‘संस्कृति व सम्पदा’या संयोजन डा. चुन्दा वज्राचार्य, ‘भाषा, लिपि व साहित्य’या संयोजन प्रा. प्रेमशान्ति तुलाधर, ‘म्ये, बाजं व प्याखं’या संयोजन त्रिरत्न मानन्धर व ‘शिल्प, प्रविज्ञि व ज्ञान’या संयोजन विश्व शाक्यं यानादीगु खः ।
ज्याझ्वलय् सफू पिथनेत ग्वाहालि यानादीपिं सकसितं एकेदेमिया सदस्य सचिव पुष्पराज राजकर्णिकारं सुभाय् देछायादीगु खः ।