ने. सं. ११४४ कौलाथ्व दशमी - स्याक्वत्याक्व

बुंगद्यः ‘व्यवस्थापन’या निगू लँपु

येँ (नेपालभाषा टाइम्स)- किपुलिइ पलिस्था याःम्ह बुंगद्यःया विवादास्पद मूर्तियात आः किपूमित थःपिंसं हे माःगु व्यवस्थापन याइगु जूगु दु । किपुलिइ पलिस्था याःगु बुंगद्यःया मूर्ति गुथि संस्थानयात लःल्हायेमाः धकाः बुंगद्यःया पानेजुपिंसं न्ह्यःने तःगु शर्तयात स्वीकार यासें कन्हय् जेठ ४ गते तकया दुने मूर्तिया व्यवस्थापन यायेगु खँ धाःगु दु ।

जेठ ४ गते तकया दुने मूर्तिया व्यवस्थापन यात धाःसा जेठ ५ गते परम्पराकथं किपुलिइ बुंगद्यःया प्रसाद तः वयेगु जुइ धकाः पानेजुपिंसं शर्त तःगु खः । आः थ्व मूर्तिया अन्तिम व्यवस्थापन गय् यानाः यायेगु धइगु खँयात कयाः किपू नगरपालिकाय् थौं बैठक च्वनाः निर्णय पिकाइगु खँ धाःगु दु ।

थुकिया व्यवस्थापन किपूमित थःपिं हे च्वनाः यायेगु धाःसां गज्याःगु व्यवस्थापन जुइ धकाः धाःसा धाःगु मदुनि । बैठकय् सहभागी प्रतिनिधितय्सं धाः कथं थ्व व्यवस्थापनया निगू उपाय दु । छगू, पानेजुपिंसं धाः थें गुथि संस्थानयात लःल्हायेगु । मेगु, बुंगद्यःया मूर्ति दयेकाः यदि गनं नं तये हे मजिउ धइगु खःसा थ्व मूर्ति दयेकूगु नं पाय्छि मजुल, उकिं थुकियात गाले यानाः मदयेका हे छ्वयेगु । किपुलिइ थ्व निगू विकल्पया बारे खँल्हाबल्हा जुयाच्वंगु दु । थौं च्वनीगु मुँज्यां थ्व निगू मध्य् छगू विकल्प ज्वनीगु खँ धाःगु दु ।

थ्व निगू मध्येय् छगू विकल्पय् पानेजुपिं नं सहमत जुइ फइगु खँ धाःगु दु । थ्व निर्णय जुइवं कन्हय् जेठ ४ गते हे उकिया कार्यान्वयन समेत यायेगु धाःगु दु । कन्हय् ४ गते थुकिया कार्यान्वयन यात धाःसा जक जेठ ५ गते स्वां तः वयेगु खँ पानेजुपिंसं धाःगु दु ।

थ्व मूर्ति दयेकेगु लागिं येँ महानगर–पालिकां करिब १७ लाख तका दां ग्वाहालि याःगु खः । यदि द्यः गाले यानाः मदयेका छ्वत धाःसा मनपाय् बेरुजु वने फइगु खँ धाःगु दु । उकिं म्हीग मनपाया नगर प्रहरीपिं वनाः उगु मूर्ति येँय् तयेगु धकाः वंगु खः । तर किपू नगरपालिकां बिया मछ्वः । पानेजुपिंसं नं मूर्ति येँ मनपायात बी मजिउगु खँ धाःगु दु ।
जेठ ५ गते किपुलिइ स्वां तः वइपिं जल पानेजुपिंत तःजिक लसकुस यायेगु तयारी जुयाच्वंगु खँ नं सीदुगु दु ।